गणपतीपुळे/ वार्ताहर
गणपतीपुळे येथे 10 जानेवारीला नववर्षातील एकमेव अंगारकीचा योग जुळून आल्याने या अंगारकी यात्रेसाठी महाराष्ट्रातील कानाकोपऱयातील भाविक मोठय़ा संख्येने स्वयंभू श्रींच्या दर्शनासाठी उपस्थिती लावतील असा अंदाज स्थानिक व्यावसायिकांकडून व्यक्त करण्यात आला आहे .
या अंगारकी यात्रा उत्सवासाठी घाटमाथ्यावरील कोल्हापूर, सांगली, सातारा कराड, इस्लामपूर, कवठेमहाकाळ, मिरज आदी ठिकाणाहून लाखो भाविक स्वयंभू श्रींच्या दर्शनासाठी येत असतात. यातील घाटमाथ्यावरील काही निवडक गणेश मंडळांकडून भाविकांसाठी खिचडी प्रसाद व महाप्रसादाचे वाटप देखील केले जाते.
या यात्रोत्सवासाठी स्वयंभू श्रींचे मंदिर पहाटे साडेतीन वाजता दर्शनासाठी खुले होणार असून प्रारंभी मंदिराचे मुख्य पुजारी अमित घनवटकर व त्यांचे सहकारी यांची वतीने पूजाअर्चा व आरती झाल्यानंतर भाविकांना दर्शनासाठी मंदिरात सोडण्यात येणार आहे. दर्शनासाठी मंदिर परिसरात दर्शन रांगांची व्यवस्था करण्यात आली आहे. तसेच दर्शन रांगेच्या ठिकाणी भाविकांना पिण्याच्या पाण्याची सोय व दर्शन रांगा व मंदिर परिसर,समुद्र चौपाटी परिसर आदी परिसरात विद्युत व्यवस्था गणपतीपुळे देवस्थान समिती व ग्रामपंचायत गणपतीपुळे यांच्या संयुक्त विद्यमाने करण्यात आली आहे
गणपतीपुळे देवस्थान समिती, ग्रामपंचायत गणपतीपुळे व जयगड पोलीस ठाणे आदी यंत्रणा सज्ज झाल्या असून जयगड पोलिस ठाण्याच्या अखत्यारीतील एकूण 22 पोलीस अधिकारी व 175 कर्मचारी तसेच 30 राखीव पोलीस दलाचे कर्मचारी बंदोबस्तासाठी संपूर्ण गणपतीपुळे परिसरात तैनात ठेवण्यात येणार आहेत यावेळी कुठलाही अनुचित प्रकार घडू नये किंवा संशयास्पद हालचाली दिसून दिसून येऊ नये याकरिता विशेष बंदोबस्त ठेवण्यात येणार आहे.
