‘झी कॉमेडी शो’ देणार तणावाला मुक्ती

सध्याच्या कोरोना विषाणूच्या साथीने भारतीय समाजावर नैराश्याचे सावट आणले असले, तरी ‘झी टीव्ही’ने या उदास वातावरणात आपल्या आगामी हलक्याफुलक्या कॉमेडी कार्यक्रमाद्वारे प्रेक्षकांच्या चेहऱयावर हास्य फुलवून त्यांना या तणावातून काहीशी मुक्तता देण्याचा प्रयत्न केला आहे. झी कॉमेडी शो हा कार्यक्रम सुरु झाला आहे. त्यात केवळ विनोदी चुटकेच नव्हे, तर विनोदाचे सर्व प्रकार हाताळले जातील. विनोदी प्रहसने, नकला, स्टॅण्ड-अप कॉमेड, नाटय़छटा वगैरे विनोदाचे सर्व प्रकार यात सादर केले जातील. या कार्यक्रमात देशातील सर्व आघाडीचे विनोदी कलाकार सहभागी होणार असून त्यांच्या विनोदी कार्यक्रमांचे परीक्षण चक्क नामवंत नृत्यदिग्दर्शिका आणि चित्रपट दिग्दर्शिका फरहा खान करणार आहे. झी कॉमेडी शो या कार्यक्रमाचे एक वैशिष्टय़ म्हणजे त्याचे अतिशय विचित्र आणि चक्रावून टाकणारे आणि हास्य निर्माण करणारे नेपथ्य. त्याचा सेट सलग सरळ नसून तो मध्येच उतार आहे, तर एका भिंतीवर 90 अंशांत एक डायनिंग टेबल ठेवलेले दिसेल! सेटवर अनेक विचित्र वस्तू मांडलेल्या असतील आणि कधी कधी विनोदवीरांना त्यांचा वापर करून वैशिष्टय़पूर्ण विनोदनिर्मिती करण्यास सांगण्यात येईल. दर कार्यक्रमात विनोदवीरांचे दोन संघ असतील, या कार्यक्रमात अली असगर, सुगंधा मिश्रा भोसले, डॉक्टर संकेत भोसले, गौरव दुबे, बलराज, सिध्दार्थ सागर, दिव्यांश द्विवेदी, तेजस्वी प्रकाश, चित्राशी रावत, आदित्य नारायण आणि पुनित जे. पाठक यांच्यासारख्या अनेक  विनोदवीरांचा समावेश असेल. या स्पर्धकांनी कार्यक्रम सादर केल्यावर त्यांना त्याचे गुण सांगण्याऐवजी परीक्षक फरहा खान ही लाफिंग बुध्दा बनेल.