प्रतिनिधी / हातकणंगले
कुंभोज ता. हातकणंगले येथील वैभव बापुसो दानोळे या युवकाचा रविवारी पहाटे अपघाती मृत्यू झाला नेज हद्दीतील पाणीपुरवठा संस्थेच्या पाण्याच्या टाकीवरून पाय घसरून पडल्याने त्याचा जागीच मृत्यू झाला या घटनेची नोंद हातकणंगले पोलिस ठाण्यात झालेली आहे.
या बाबत पोलिसांतून मिळालेली अधिक माहिती अशी वैभव दानोळे हा येथील पाणी पुरवठा संस्थांच्या पंप हाऊसवरती ऑपरेटर म्हणून काम करत होता. पहाटेच्या वेळी पाण्याच्या टाकीतील पाण्याची पातळी पाहण्यासाठी जिन्यावरून टाकीवर चढला असता तोल जाऊन खाली कोसळला. यावेळी त्याला मुक्कामार लागला होता. यावेळी शेजारी पंप हाऊसमध्ये वडील बापुसो दानोळे होते. मुलगा अजून आला नाही म्हणून पाहण्याची गेले असता त्यांना मुलगा खाली पडल्याचे दिसले. त्यांनी तात्काळ घराशेजारील नातेवाईकांना बोलावून उपचारासाठी प्रथम येथील खाजगी त्यानंतर ग्रामीण रुग्णालय हातकणंगले येथे दाखल केले. मात्र, त्यांच्या प्रयत्नांना यश आले नाही उपचारादरम्यान त्याचा मृत्यू झाल्याचे डॉक्टरांनी घोषित केले. शवविच्छेदनानंतर मृतदेह नातेवाईकांच्या ताब्यात देण्यात आला. अधिक तपास हातकणंगले पोलिस करत आहे.
