उदगाव/वार्ताहर
येथील कृष्णा नदीपात्रामध्ये मगरीचा वावर आढळल्याने तसेच याचा व्हिडिओ सोशल मीडियावर व्हायरल झाल्याने परिसरात भीतीचे वातावरण पसरले आहे. यामुळे ग्रामस्थांतून प्रशासनाने लवकरात लवकर त्याचा बंदोबस्त करावा अशी मागणी होत आहे.
गेल्या पाच-सहा दिवसांपासून येथील नदीघाटावर तसेच मळी भाग चिंचवाड पासून पुढे या उमळवाड पर्यंत मगरीचा वावर आढळला आहे. या परिसरमध्ये 10 ते 12 फूट लांब दोन ते तीन मगर ग्रामस्थ व शेतकऱ्यांनी पाहिल्याचे बोलले जात आहे. येथील कृष्णा घाटावर सकाळी जयसिंगपूर उदगाव अंकली संभाजीपुर आदी भागातून पोहण्यासाठी व आंघोळीसाठी नागरिकांची गर्दी असते तसेच महिला आपली जनावरे व धुणी धुण्यासाठी नदीकाठावर जात असतात. अनेक शेतक-यांच्या मोटारी नदीकाठी असल्याने त्यांनाही नदीकाठी जावे लागते.यासाठी या मगरीचा शोध घेऊन तातडीने बंदोबस्त करावा अशी मागणी वन विभाग व प्रशासनाकडे ग्रामस्थांनी केली आहे. काही युवकांनी येथील अंकली पुलावरून या मगरीचे व्हिडीओ चित्रीकरण केले असून ते सध्या सोशल मीडियावर व्हायरल झालेले आहे. त्यामुळे नागरिकांत भीतीचे वातावरण निर्माण झाले आहे.