ऑनलाईन टीम / काबुल :
कंदहार प्रांतातील अरघांदाब जिल्ह्यात सुरक्षा दल आणि तालिबानी दहशतवाद्यात जोरदार चकमक झाली. या चकमकीनंतर अफगाण सैन्याने केलेल्या हल्ल्यात 175 दहशतवादी मारले गेले असून, 26 जण जखमी झाले आहेत. एका वृत्तसंस्थेने अफगाण सुरक्षा दलातील सूत्रांच्या हवाल्याने हे वृत्त दिले आहे.
अफगाण सुरक्षा दलाने कंदहार प्रांतात तालिबान्यांच्या विरोधात कारवाईची जोरदार मोहीम राबवली आहे. दरम्यान, अफगाणिस्तानच्या सैन्याने सोमवारी रात्री तालिबानी अड्डयांवर हवाई हल्ले आणि थेट तोफांचा मारा केला. त्यामुळे या हल्ल्यात 175 तालिबानी ठार झाले. तर 26 जण जखमी झाले.
अफगाण सैन्याच्या हल्ल्यात तालिबानचे 7 कमांडरही मारले गेले आहेत. मात्र, या चकमकीदरम्यान तालिबानचे फार कमी नुकसान झाल्याची प्रतिक्रिया तालिबानच्या प्रवक्त्याने दिली आहे.