आतापर्यंत 200 इंच पाऊस
वार्ताहर / आंबोली:
महाराष्ट्राची ‘चेरापुंजी’ अशी ओळख असलेल्या आंबोली या पर्यटनस्थळी यावर्षी 1 जून ते 25 जुलै या कालावधीत सर्वाधिक सुमारे 200 इंच ( 5000 मि. मी.) पाऊस झाला आहे. तर 23 जुलैला एका दिवसात 17 इंच (430 मि.मी.) अशी आजवरची विक्रमी नोंद करण्यात आली आहे. तसेच यंदा पावसाला असलेले पोषक वातावरण तथा सध्याची अतिवृष्टी पाहता सुमारे 450 ते 500 इंच ( 11,500 ते 12,500 मि.मी.) पावसाची शक्यता आहे.
आंबोली हे देशातील महत्वाचे थंड हवेचे ठिकाण आहे. दरवर्षी येथे लाखो पर्यटक भेट देतात. तर पावसाळय़ात येथे वर्षा पर्यटन खुलते. प्रवाहीत होणारे धबधबे आणि दाट धुक्याचा मनोहारी आनंद लुटण्यासाठी दरवर्षी पावसाळय़ात लाखो पर्यटकांची पावले आंबोलीकडे वळतात. मात्र, गेली अडीच वर्षे दरडी आणि कोरोना संकटांमुळे येथील पर्यटनाला फटका बसला आहे.
पावसाळय़ात आंबोलीचे सौंदर्य अधिक फुलते. तसेच येथे दरवर्षी सर्वाधिक 350 इंच पाऊस पडतो. मात्र, यंदा 1 जून ते 25 जुलै या कालावधीतच 200 इंच पावसाची नोंद झाली आहे. त्यामुळे सप्टेंबरपर्यंतचा काळ लक्षात घेता यंदा पावसाचा उच्चांक होण्याची शक्यता आहे.