वार्ताहर/ पाली
वाहनांसाठी पसंतीचा किंवा आकर्षक नोंदणी क्रमांक घेण्याकडे अनेकांचा ओढा असतो. पण आता हे क्रमांक महागणार आहेत. चारचाकीसाठी 10 हजारांपासून 5 लाखांपर्यंत, तर दुचाकीसाठी 5 हजारांपासून 1 लाखांपर्यंतची शुल्क आकारणी केली जाणार आहे. राज्याच्या गृहविभागाकडून या बाबतची अधिसूचना काढण्यात आली असून त्यावर नागरिकांच्या सूचना हरकती मागवण्यात आल्या आहेत.
वाहनांची नवी मालिका जाहीर झाल्यापासून आकर्षक नोंदणी क्रमांकासाठी प्रादेशिक परिवहन कार्यालयाकडे मोठी मागणी येत असते. पूर्वी त्यासाठी कार्यालयात गर्दी होत असल्याने आता अर्ज मागवले जातात. एकाच क्रमांकासाठी अधिक मागणी असल्यास लिलाव करण्यात येतो. यातून कोटय़वधी रुपयांचा महसूल शासनाला मिळतो. शासनाने आकर्षक मोटार क्रमांकासाठी प्रस्तावित केलेली दर वाढ स्थगित करण्याची मागणी चालकातून होऊ लागली आहे.