प्रतिनिधी / कोल्हापूर
शिक्षण व उच्च तंत्र शिक्षण मंत्री उदय सामंत दि. 25 रोजी कोल्हापूर दौऱयावर येणार आहेत. सकाळी 11 वाजता शिवाजी विद्यापीठात `उच्च व तंत्र शिक्षण मंत्रालय आपल्या विभागात’ या अभिनव उपक्रमाला सुरुवात होणार आहे. प्राध्यापक, कर्मचारी, विद्यार्थ्यांनी समस्या मांडण्यासाठी उपस्थित राहण्याचे आवाहन उच्च व तंत्र शिक्षण मंत्री उदय सामंत यांनी केले आहे.
उच्च व तंत्र शिक्षण मंत्री सामंत शासकीय विश्रामगृह येथे सकाळी 9 वाजता पदाधिकाऱ्यांच्या भेटीगाठी घेणार आहेत.सकाळी 10 वाजता खासदार धैर्यशील माने यांच्या समवेत नाबार्डचे माजी अध्यक्ष डॉ. यशवंत थोरात यांच्या ताराबाई पार्कातील निवास्थानी भेट. सकाळी 11 वाजता विद्यापीठातील दीक्षांत हॉलमध्ये `उच्च व तंत्र शिक्षण मंत्रालय आपल्या दारी’ उपक्रमाला उपस्थिती.
सायंकाळी 5 वाजता शिवाजी विद्यापीठात पत्रकार परिषद. सायंकाळी 6 वाजता सायबर चौकातील आजी – माजी विद्यार्थी कृती समिती संचलित विद्यार्थी सहाय्यता केंद्राचे उद्घाटन. सायंकाळी 6.30 वाजता गांधी मैदान येथील फुटबॉल टर्फ मैदानाचे शिक्षणमंत्र्यांच्या हस्ते उद्घाटन. सायंकाळी 7 वाजता जुना बुधवार पेठ येथे शिक्षणमंत्री उदय सामंत यांच्या उपस्थितीत माजी महापौर सरिता मोरे व माजी स्थायी समिती सभापती नंदकुमार मोरे यांचा शिवसेना पक्ष प्रवेश. रात्री 8 वाजता शनिवार पेठ येथील जोशी गल्ली कॉर्नर येथे शिवसेनेच्या वतीने आयोजित जाहीर सभेला उपस्थिती असा त्यांचा दौरा आहे.यानंतर रात्री उशिरा ते सिंधुदुर्गला रवाना होणार आहेत.