चित्रफिती अत्यंत घाबरविणाऱया
मगरींसमोर कुणाचा निभाव लागतो, विशेषकरून माणसाची स्थिती त्याचा जबडा बघूनच खस्ता होते. परंतु मॅट राइट नावाचा व्यक्ती या धोकादायक प्राण्याला एकटय़ानेच पकडण्यात तरबेज आहे. कुणाचीच मदत न घेता मगरीवर नियंत्रण मिळविण्यात त्यांचा हात कुणीच धरू शकत नाही.
मगर आणि सुसरींना पकडण्यास मॅट तरबेज आहे. मॅट स्वतःच्या चित्रफिती आणि छायाचित्रे इन्स्टाग्रामवर पोस्ट करत असतो. तसेच वन्यप्राण्यांपासून अंतर राखा, जेणेकरून माणूस तसेच प्राण्यांना नुकसान होणार नाही असे आवाहन तो लोकांना करतो.
मॅट मगर पकडतानाची छायाचित्रे लोक टिपत असतात. एवढेच नव्हे तर मॅटने अनेक मगरींना वाचविले आहे. मॅट एका छायाचित्रात मगरीसोबत पाण्यात उतरलेला दिसून येतो. त्याची छायाचित्रे आणि चित्रफिती पाहून मॅट या प्राण्यासोबत सहजपणे वावरत असल्याचे जाणवते.
मगरींसोबतच्या त्याच्या छायाचित्रांना आणि चित्रफितींना सोशल मीडियावर मोठा प्रतिसाद मिळत असतो. नागरी वस्तीनजीक मगरींचे अस्तित्व आढळून आल्यावर मॅटलाच पाचारण करण्यात येते. मॅट देखील अत्यंत सहजपणे आणि कुणालाच नुकसान न पोहोचविता मगरींना तेथून हलवितो.