फरार सुत्रधाराला अटक : कारवाईवेळी शस्त्रास्त्र, कागदपत्रे जप्त
प्रतिनिधी/ बेंगळूर
बेंगळूरच्या डी. जे. हळ्ळी आणि के. जे. हळ्ळी येथील हिंसाचाराचा तपास राष्ट्रीय तपास यंत्रणेने (एनआयए) हाती घेतला असून बुधवारी बेंगळूरमधील 30 ठिकाणी एकाच वेळी छापे टाकले. छाप्यादरम्यान हिंसाचाराचे षड्यंत्र रचल्याप्रकरणी फरार असणाऱया एका संशयित आरोपीला अटक करण्यात आली. सादिक अली असे त्याचे नाव आहे. तोच या प्रकरणाचा सुत्रधार असल्याचे समजते. छाप्यावेळी एअरगन, काडतुसे, धारदार शस्त्रs, लोखंडी रॉड, डिजिटल उपकरणे, डिव्हीआर वादग्रस्त संघटनांशी संबंधित कागदपत्रे जप्त करण्यात आली आहेत.
दोन दिवसांपूर्वीच एनआयएने हिंसाचार प्रकरणाचा तपास हाती घेतला होता. बेंगळूरच्या सीसीबी पोलिसांनी दिलेल्या माहितीच्या आधारे एनआयएच्या अधिकाऱयांनी शहरात विविध ठिकाणी एकाच वेळी छापे टाकून महत्त्वाची माहिती जमा केली. हिंसाचार घडवून आणण्यास कारणीभूत असणारे आणि षडय्dांत्र रचणाऱयांच्या निवासस्थानांवर व इतर ठिकाणी छापे टाकण्यात आले. कारवाईदरम्यान, 11 ऑगस्टच्या रात्रीपासून फरार असणाऱया सादिक अली याच्या मुसक्या आवळण्यात आल्या आहे. सादिक हा बँकेत कर्जवसुली एजंट म्हणून काम करतो. हिंसाचार प्रकरणातील प्रमुख आरोपींपैकी तो एक आहे.
हिंसाचार प्रकरणी अटकेत असलेला एसडीपीआय संघटनेचा नेता सय्यद मुजम्मिल, काँग्रेस नेता कलीम पाशा, पुलकेशीनगरचे निजद अध्यक्ष वाजिद पाशा, बेंगळूरचे माजी महापौर संपतराज यांचा साहाय्यक अरुण, दशहतवादी संघटनेच्या संपर्कात असल्याचा आरोप असणारा समिऊद्दिन आणि फिरोज पाशा यांची निवासस्थाने व कार्यालयांवर धाडी टाकण्यात आल्या आहेत.
काँग्रेस आमदार अखंड श्रीनिवासमूर्ती यांचा भाचा नवीन याने सोशल मीडियावर टाकलेल्या वादग्रस्त पोस्टनंतर बेंगळूरच्या डी. जे. हळ्ळी व के. जे. हळ्ळी येथे हिंसाचार झाला होता. 10 ऑगस्ट रोजी समाजकंटकांनी आमदार अखंड श्रीनिवासमूर्ती यांचे निवासस्थान, पोलीस स्थानक, पोलीस वाहने, सार्वजनिक मालमत्ता व खासगी मालमत्तांची हानी केली होती. जाळपोळ, दगडफेकीमुळे परिस्थिती नियंत्रणाबाहेर गेली होती.