प्रतिनिधी / शिरोली
शिरोली औद्योगिक वसाहतीमध्ये कारखान्यातील जॉब घेऊन जाण्यासाठी आलेल्या मिनी ट्रकला अचानक आग लागली. या आगीत ट्रक चालक किरकोळ जखमी झाला आहे. तर ट्रकची केबीन जळून खाक झाली आहे. ही घटना शनिवार दि १४ ऑगस्ट रोजी सायंकाळी सात वाजता घडली.
घटनास्थळावरून मिळालेली माहिती अशी की, चेन्नई (तामिळनाडू) येथील माल वहातुकीचा मिनी ट्रक शिरोली औद्योगिक वसाहतीमधील स्प्रे अॅटो या कंपनीत आला होता. माल तयार नसल्याने ट्रक रस्त्याच्या कडेला उभा करुन चालक केबिन मध्ये विश्रांती घेत होता.
दरम्यान अचानक ट्रकच्या केबीनमध्ये आग लागली. आग लागताच चालक केबिन मधून तत्काळ बाहेर आला. त्यामुळे जिवीतहानी झाली नाही. या घटनेची माहिती मिळताच कोल्हापूर महापालिकेची अग्नीशमन गाडी आली. त्यातील जवानांनी बंबातील पाण्याचा मारा करून आग आटोक्यात आणली. याची माहिती समजताच कामगारांनी मोठी गर्दी केली होती.पुंडलिक पोवार, विजय सुतार, व उमाजी निकम यांनी आग आटोक्यात आणण्यासाठी विशेष परिश्रम घेतले.