नागरिकांनी तरुणाला पकडून दिला चोप
प्रतिनिधी / बेळगाव
खासबाग येथे भरणाऱया आठवडी बाजारात मोबाईल चोरीच्या घटना वाढल्या आहेत. रविवारी सकाळी भर बाजारात मोबाईल चोरणाऱया एका तरुणाला पकडून त्याला शहापूर पोलिसांच्या ताब्यात देण्यात आले आहे. त्याचा साथीदार फरारी झाला आहे.
रविवारी सकाळी 11 च्या सुमारास बाजारासाठी आलेल्या एका इसमाचा मोबाईल पळवताना नागरिकांनी पाठलाग करून मोबाईल चोराला पकडले. जमावाने त्याला चोप दिला असून पळताना पडून तो किरकोळ जखमी झाला आहे. त्याचा आणखी एक साथीदार मोबाईलसह फरारी आहे. या घटनेनंतर शहापूर पोलिसांना पाचारण करण्यात आले. नागरिकांनी ताब्यात घेतलेल्या तरुणाला शहापूर पोलिसांच्या स्वाधीन केले. यासंबंधी रविवारी रात्री शहापूर पोलीस स्थानकाशी संपर्क साधला असता त्याच्यावर कारवाई केली नसल्याचे पोलिसांनी सांगितले.