ऑनलाईन टीम / बीजिंग :
चीनमधील कोरोनाबाधितांची संख्या 84 हजार नव्हे तर 6 लाख 40 हजार असल्याची माहिती चीनमधील चांगशा सिटीतील राष्ट्रीय संरक्षण तंत्रज्ञान विद्यापीठाने दिली आहे.
चीनचा खोटेपणा जगाला ज्ञात असल्याने चीनमधील कोरोनाबधितांच्या आकडेवारीवर अमेरिकेसह अनेक देशांनी यापूर्वीच संशय व्यक्त केला होता. काही देशांनी थेट चीनवर आकडेवारी लपविल्याचे आरोप केले आहेत. मात्र, चीनमधील लष्करी विद्यापीठाचे आकडे पाहून सर्वांनाच धक्का बसला आहे.
लष्करी विद्यापीठाच्या माहितीनुसार, वुहान शहरातून पसरलेल्या कोरोनाने चीनमधील 230 शहरांमध्ये थैमान घातला आहे. सत्ताधाऱ्यांच्या लपवाछपवीच्या धोरणांमुळे खरी आकडेवारी जगासमोर आली नाही. मात्र, विद्यापीठाकडे चीनमधील प्रत्येक रुग्णाची, रुग्ण दाखल झालेले हॉस्पिटल आणि त्याच्या ठिकाणाची माहिती आहे. बरे झालेले रुग्ण आणि उपचारात असलेल्या रुग्णांची ही आकडेवारी आहे. चीनमध्ये आतापर्यंत 6 लाख 40 हजार रुग्णांना कोरोनाची बाधा झाली आहे.
मात्र, चीनच्या परराष्ट्र मंत्रालयाचे प्रवक्ते झाओ लिजान यांनी एक पत्रक काढून लष्करी विद्यापीठाच्या आकडेवारीचे खंडन केले आहे.