17 जणांना अटक – दोन पोलीस अधिकारी निलंबित
वृत्तसंस्था/ धनबाद
झारखंडच्या धनबाद येथे अतिरिक्त जिल्हा तसेच सत्र न्यायाधीश उत्तम आनंद यांच्या संशयास्पद मृत्यूप्रकरणी पोलिसांनी रविवारी 243 जणांना ताब्यात घेतले, तर अन्य 17 जणांना अटक केली आहे. याप्रकरणी दोन पोलीस अधिकाऱयांना निलंबित करण्यात आले आहे.
न्यायधीशाच्या संशयास्पद मृत्यूप्रकरणी करण्यात आलेल्या कारवाईचा तपशील धनबादचे वरिष्ठ पोलीस अधीक्षक संजीव कुमार यांनी दिला आहे. तर न्यायाधीशांना धडक दिलेल्या ऑटो रिक्षाच्या चोरीची तक्रार नोंदविण्यास विलंब केलयाप्रकरणी पाथरडीह पोलीस स्थानकाचे प्रभारी उमेश मांझी यांना निलंबित करण्यात आले आहे. घटनेचे सीसीटीव्ही फुटेज सार्वजनिक केल्याप्रकरणी पोलीस अधिकारी आदर्श कुमार यांच्यावरही निलंबनाची कारवाई झाली आहे.
न्यायाधीश आनंद 28 जुलै रोजी मॉर्निंग वॉकसाठी बाहेर पडले असता एका ऑटो रिक्षाने त्यांना मागून धडक दिली होती. यामुळे न्यायाधीशांचा घटनास्थळीच मृत्यू झाला होता. झारखंड उच्च न्यायालयाच्या निर्देशावर पोलीस महासंचालकांनी तीन सदस्यीय विशेष तपास पथकाची स्थापना केली होती. हे पथक उच्च न्यायालाच्या देखरेखीखाली या प्रकरणाचा तपास करणार आहे.
ऑटोरिक्षा चालक लखनकुमार वर्मा तसेच दुसरा आरोपी राहुल वर्मा देखील स्थानिक रहिवासी आहे. घटनेवेळी ऑटोरिक्षा चालवत होते अशी कबुली लखनकुमारने दिल्याचे विशेष तपास पथकाकडून सांगण्यात आले. यादरम्यान शनिवारी मुख्यमंत्री हेमंत सोरेन यांनी या पूर्ण प्रकरणाची सीबीआयकडून चौकशी करविण्याची शिफारस केली होती.
धरपकड सुरू
धनबादमधील न्यायाधीशाच्या मृत्यूचे गूढ उकलण्यासाठी रविवारी 200 हून अधिक ऑटोरिक्षा ताब्यात घेण्यात आल्या. पोलिसांच्या कारवाईमुळे ऑटोरिक्षा चालक आणि मालक दोघेही त्रस्त झाले आहेत. सोमवारी देखील 100 हून अधिक ऑटोरिक्षांना पोलीस स्थानकात आणले गेले.