चिनी हेरगिरी रॅकेटचा भांडाफोड : चौकशीत महत्त्वाचा खुलासा
वृत्तसंस्था / नवी दिल्ली
भारतातील चिनी हेरगिरी प्रकरणाच्या चौकशीत महत्त्वाचा खुलासा झाला आहे. पंतप्रधान कार्यालयासह दलाई लामा आणि भारतात वापरण्यात येत असलेली सुरक्षा उपकरणेही चिनी हेरांच्या निशाण्यावर होती. चीनने भारतातील स्वतःच्या हेरांना पीएमओसह मोठय़ा कार्यालयांमधील अंतर्गत माहिती देण्यास सांगितले होते. कार्यालयात कुठला व्यक्ती महत्त्वाचा आहे, कोण कुठल्या पदावर आहे आणि किती प्रभावशाली आहे याची माहिती जमविण्याचा निर्देश होता असे चिनी हेर क्विंग शी याने चौकशीदरम्यान म्हटले आहे.
चीनच्या हेरगिरीच्या जाळय़ात महाबोधी मंदिरातील बौद्ध भिक्षू आणि कोलकात्यातील महिला सामील असल्याचे चौकशीतून समोर आले आहे. क्विंग शी याची या महिलेची भेट करून देण्यात आली होती. ही महिला महत्त्वाचे दस्तऐवज सोपवित होती. क्विंग त्यांचे भाषांतर करून ते चीनला पाठवत होता.
पत्रकारासह 3 जण अटकेत
याप्रकरणी दिल्ली पोलिसांच्या विशेष शाखेने मागील महिन्यात क्विंग शी याच्यासह नेपाळी साथीदार शेर बहादूर आणि भारतीय पत्रकार राजीव शर्मा याला अटक केली होती.