ऑनलाईन टीम / यवतमाळ :
यवतामळमधील उमरखेडनजीकच्या दहागाव येथे पुराच्या पाण्यात एसटी बस वाहून गेल्याची दुर्देवी घटना आज सकाळी आठ वाजण्याच्या सुमारास घडली. पुरात वाहून गेलेली बस नागपूर आगाराची असून बसमध्ये चालकासह सहा जण असल्याची माहिती मिळत आहे. स्थानिक आणि प्रशासनाच्या मदतीने बचावकार्याला वेग आला आहे.
आज सकाळी आठच्या सुमारास नागपूर आगाराची एसटी बस उमरखेडवरुन पुसद येथे जात होती. सोमवारी रात्री विदर्भाला मुसळधार पावसाने झोडपल्याने दहागाव येथील नालाच्या पुलावरून पाणी वाहत होते. मात्र, एसटी चालकाने भलतेच धाडस दाखवत ही बस पुलावरुन नेल्याने ती पुराच्या पाण्यात वाहून गेली. या बसमध्ये चालकासह सहा जण असल्याची माहिती मिळत आहे. स्थानिकांच्या मदतीने दोन प्रवाशांना वाचवण्यात यश आले आहे तर एका प्रवाशाचा मृत्य झाला आहे. इतर प्रवाशांच्या बचावासाठी स्थानिक प्रशासनाकडून बचावकार्य सुरू आहे.