वार्ताहर /कारदगा :
येथील साहित्य विकास मंडळाचे अध्यक्ष व कसनाळ प्राथमिक शाळेचे शिक्षक प्रकाश काशीद यांना शिवम सामाजिक व शैक्षणिक संस्था राशीवडे बुद्रुक यांच्यावतीने गुरुमाउली पुरस्कार देऊन सन्मानित करण्यात आले. कोल्हापूर येथील राम गणेश गडकरी हॉलमध्ये लेफ्टनंट कर्नल डॉ. सतीश ढगे-औरंगाबाद यांच्या हस्ते हा देण्यात आला. अध्यक्षस्थानी माजी शिक्षण उपसंचालक संपतराव गायकवाड होते. प्रकाश काशीद हे शिक्षकी पेशाबरोबरच गत 25 वर्षे कारदगा येथे भरविण्यात येणाऱया ग्रामीण मराठी साहित्य संमेलनामध्ये सक्रिय सहभाग घेत आहेत. याशिवाय अनेक ठिकाणी एकपात्री प्रयोग सादर करून समाज प्रबोधनाचे कार्य करत आहेत. याची दखल घेऊन त्यांना हा पुरस्कार प्रदान करण्यात आला आहे. कोल्हापूरच्या महापौर सुरमंजिरी लाटकर, प्राचार्य प्रभाकर हेरवाडे, शिवम संस्थेचे अध्यक्ष दिगंबर टिपूगडे, धनेश बोरा, प्रा. आण्णासाहेब भागाजे यांच्यासह मान्यवर उपस्थित होते.