वृत्तसंस्था/ नवी दिल्ली
मध्य प्रदेशकडून अनेक स्पर्धामध्ये खेळणारी महिला अष्टपैलू क्रिकेटपटू अन्शुला राव उत्तेजक चाचणीत दोषी ठरल्याने तिच्यावर चार वर्षांची बंदी घालण्याचा निर्णय नाडाच्या पॅनेलने जाहीर केला आहे. उत्तेजक चाचणीत दोषी ठरणारी राव ही भारताची पहिली महिला क्रिकेटपटू आहे.
अन्शुला राव ही भारतीय क्रिकेट नियंत्रण मंडळाची अधिकृत नोंद झालेली महिला क्रिकेटपटू आहे. मध्य प्रदेश क्रिकेट संघटना ही बीसीसीआयशी संलग्न आहे. 2019-20 साली झालेल्या बीसीसीआयच्या 23 वर्षाखालील वयोगटाच्या महिलांच्या टी-20 क्रिकेट स्पर्धेत रावने आपला शेवटचा सहभाग दर्शविला होता. गेल्यावर्षी 14 मार्च रोजी बडोदा येथे रावची उत्तेजक चाचणी घेण्यात आली आणि त्यात निर्बंध घातलेले द्रव्य आढळल्याने तिच्यावर नाडाच्या शिस्तपालन पॅनेलने चार वर्षांची बंदी घालण्याचा निर्णय घेतला.