मुंबई \ ऑनलाईन टीम
पंतप्रधान नरेंद्र मोदी यांनी आदेश दिला तर आम्ही वाघाशीही दोस्ती करू, असे वक्तव्य भाजप प्रदेशाध्यक्ष चंद्रकांत पाटील यांनी पुण्यात केलं होतं. त्यानंतर नाशिक दौऱ्यावर असलेले शिवसेनेचे नेते संजय राऊत यांनी देखील वाघाशी कुणाची मैत्री होत नाही, मैत्री कोणाशी करायची हे वाघ ठरवत असल्याचं म्हणत प्रत्युत्तर दिलं होतं. आता यावर राष्ट्रवादी काँग्रेसचे नेते आणि मंत्री छगन भुजबळ यांनी देखील प्रतिक्रिया दिली आहे.
राष्ट्रवादी नेते छगन भुजबळ यांनी प्रसार माध्यमांशी संवाद साधताना पंतप्रधान नरेंद्र मोदी आणि मुख्यमंत्री उद्धव ठाकरे यांच्यातील वैयक्तिक भेटीवर प्रश्न करण्यात आला होता. तसेच शिवसेना मवाळ भूमिका घेत असल्याचे विचरले असता भुजबळ यांनी प्रतिक्रिया दिली आहे. राज्याचे अनेक प्रश्न केंद्राशी संबंधित आहेत. यामुळे जमवून घ्यावे लागते. परंतु मैत्री करायची की नाही हे वाघाच्या मनावर आहे. वेळ पडल्यास वाघ पंजा मारू शकतो, असा इशारा छगन भुजबळ यांनी भाजपला दिला आहे.
नवी मुंबई विमानतळाच्या नामकरणावरुन बराच वाद सुरु आहे. बाळासाहेब ठाकरे असते तर त्यांनी स्वतःचं नाव विमानतळाला देणे नाकारले असते. जे.आर.डी.टाटा यांचं नाव विमानतळाला द्यायला बाळासाहेबांनी सुचवले असते, असे भुजबळ यांनी म्हटले आहे. दी. बा. पाटील यांच्याही नावाला आमचा पाठिंबा आहेच परंतु नामकरणाचा मुद्दा बसून सोडवला पाहिजे, असे मत छगन भुजबळ यांनी यावेळी व्यक्त केलं.
Previous Articleनाणोस येथे १२ जून रोजी ४५ वर्षावरील नागरिकांना लसीकरण
Abhijeet Khandekar
Meet Abhijeet Khandekar : a versatile content writer, scriptwriter, and content producer at Tarun Bharat Media. With a Master's degree in Journalism from Shivaji University, Abhijeet specializes in political news, entertainment, and local content. His captivating storytelling and deep industry knowledge make him an expert in crafting engaging narratives. Connect with Abhijeet for collaborations and captivating content that informs and entertains.