लॉकडाऊनमुळे कोकण रेल्वे मार्गावरील अजून चार गाडय़ा बंद
कणकवली:
कोरोनाचा वाढता प्रादुर्भाव व लॉकडाऊन यामुळे कोकण रेल्वे मार्गावरील अनेक गाडय़ा तात्पुरत्या स्वरुपात रद्द झाल्या आहेत. शुक्रवारीही चार गाडय़ा रद्द करण्यात आल्याचे कोकण रेल्वे प्रशासनाकडून सांगण्यात आले.
गतवर्षी मार्च महिन्यात कोरोनामुळे लॉकडाऊन जाहीर झाल्यानंतर कोकण रेलवेमार्गावरील प्रवासी गाडय़ा थांबविण्यात आल्या. पुढे लॉकडाऊनचे नियम शिथिल होऊ लागल्यानंतर कोकण रेल्वेच्या ट्रकवर गाडय़ाही धावू लागल्या होत्या. मात्र, पुन्हा एकदा कोरोनाचा कहर सुरु झाल्याने शासनातर्फे कडक निर्बंध, लॉकडाऊन जाहीर करण्यात आले आहे. परिणामी, रेल्वेच्या प्रवाशांची संख्याही घटल्याने प्रवासीगाडय़ा रद्द कराव्या लागत आहेत.
गांधीधाम – तिरुनवेली विकली फेस्टिव्हल स्पेशल (09424) 10 मेपासून व तिरुनवेली – गांधीधाम (09423) 13 मेपासून, इंदोर – कोचुवेली सुपरफास्ट विकली स्पेशल (09332) 11 मेपासून व कोचुवेली – इंदोर (09331) 14 मेपासून, हापा – मडगाव सुपरफास्ट विकली स्पेशल (02908) 12 मेपासून व मडगाव – हापा (02907) 14 मेपासून, पोरबंदर – कोचुवेली सुपरफास्ट विकली स्पेशल (09262) 13 मेपासून व कोचुवेली – पोरबंदर (09261) 16 मेपासून रद्द करण्यात आल्याची माहिती को. रे. प्रशासनाने दिली आहे.