प्रतिनिधी/ लांजा
तालुक्यातील कणगवली पेनेवाडी येथील बेपत्ता सीताराम सोमा सुवारे (वय 56, (रा. पेनेवाडी-कणगवली) यांचा शनिवारी सायंकाळच्या सुमारास कुजलेल्या स्थितीत मृतदेह सापडल्याने खळबळ उडाली आहे. संशयास्पदरित्या आढळलेल्या मृतदेहामुळे घातपाताची शक्यता वर्तवण्यात येत आहे.
2 जून रोजी सीताराम सोमा सुवारे (रा. पेनेवाडी-कणगवली) हे बेपत्ता झाल्याची तक्रार लांजा पोलीस स्थानकात नोंदवण्यात आली होती. आपली दुचाकी घेऊन सीताराम सुवारे हे सकाळी 7 वाजता कामानिमित्त घरातून बाहेर जात आहे, असे सांगून निघाले होते. यानंतर 5 जून रोजी सायंकाळी बेपत्ता सीताराम सुवारे यांची दुचाकी गाडी वेरळ-कणगवली रोडवर जाधव यांच्या बागेजवळ आढळली. गाडी आढळलेल्या ठिकाणापासून 600 मीटर अंतरावर असलेल्या दगडी गडग्याजवळ कुजलेल्या स्थितीत सुवारे यांचा मृतदेह निदर्शनास आला. यानंतर पोलीस घटनास्थळी दाखल झाले होते. संशयास्पद स्थितीत हा मृतदेह आढळल्याने घातपात असल्याची शक्यता वर्तवली जात आहे. अधिक तपास लांजा पोलीस करत आहेत.