पर्वतशिखरांवर दीड ते दोन फूट हिमाचा थर
सिमला / वृत्तसंस्था
हिमाचल प्रदेशातील डोंगराळ भागांमध्ये शुक्रवारपासून जोरदार हिमवर्षावाला प्रारंभ झाला आहे. लाहोल स्फिती येथे गेले दोन दिवस हिमवर्षाव होत आहे. रोहतांग दर्रा आणि कुंजोम येथे शुक्रवारी पहाटेपासून बर्फ पडण्यास प्रारंभ झाला. डोंगरमाथ्यांवर दीड ते दोन फूट बर्फाचा थर साचल्याचे सांगण्यात आले.
हिमाचल प्रदेशातील या हिमवर्षावाचा परिणाम हरियाणा आणि पंजाबमधील सखल प्रदेशांवरही होत आहे. या भागांमध्ये आता कडाक्याची थंडी जाणवू लागली आहे. हरियाणात काही स्थानी हलकी जलवृष्टी झाली. तसेच दाट धुकेही पसरले. यामुळे वाहतुकीत अडथळा निर्माण झाला. काही स्थानी वाहतूक बंद झाली.
बससेवा बंद
हिमाचल प्रदेशात डोंगराळ भागांमध्ये अनेक शहरे आणि वस्त्यांमध्ये बससेवा हिमवर्षावामुळे बंद झाली. कुल्लूकेलांग येथे बससेवा बंद झाल्याने पर्यटकांसमोर समस्या निर्माण झाली. अटल बोगद्यातून जाणाऱया बसेस काही काळासाठी बंद ठेवण्याचा आदेश देण्यात आला आहे. पर्यटकांना सावधानतेचा इशारा दिला गेला.
अनेक भागांमध्ये हिमवर्षाव हिमाचल प्रदेशच्या तांदी संगम, जिस्पा, कोकसर, सिस्सू, कुजोम दर्रा, रोहतांग दर्रा इत्यादी भागांमध्ये मोठय़ा प्रमाणात हिमवर्षाव होत आहे. हिमवर्षावाचे हे प्रमाण गेल्यावर्षीपेक्षा अधिक असल्याचे तज्ञांचे मत आहे. त्यामुळे यंदा उत्तर भारतात थंडीही अधिक पडेल, असे अनुमान व्यक्त करण्यात येत आहे.