वृत्तसंस्था/ टोकियो
कोरोना व्हायरचा प्रकोप वाढत असल्याने जपानच्या 70 टक्केहून अधिक लोकांना येथे होणारी ऑलिम्पिक स्पर्धा रद्द केली जावी किंवा ती पुन्हा एकदा लांबणीवर टाकावी, असे मत व्यक्त केले आहे. क्योडो न्यूजने आयोजित केलेल्या सर्वेक्षणात जपानच्या जनतेने वरीलप्रमाणे कौल दिला आहे.
येत्या जुलैमध्ये ऑलिम्पिक स्पर्धा होणार असून सुमारे शंभरहून अधिक दिवस राहिले असतानाच लोकांचा वरीलप्रमाणे कौल मिळाला आहे. या सर्व्हेमध्ये 39.2 टक्के लोकांना ही स्पर्धाच रद्द करावी, असे वाटते तर 32.8 टक्के लोकांना पुन्हा एकदा ही स्पर्धा लांबणीवर टाकली जावी, असे वाटते. फक्त 24.5 टक्के लोकांनाच क्रीडा जगतातील हा महामेळावा नियोजनाप्रमाणे पूर्ण व्हावा, असे वाटते. कोरोनाच्या चौथ्या लाटेचा प्रसार रोखण्यासाठी टोकियोने सोमवारीच तातडीची उपाययोजना सुरू केली आहे. कोरोनाचा प्रादुर्भाव वाढल्याने 92.6 टक्के लोकांनी तीव्र चिंता व्यक्त केली असल्याचे क्योडोने 10 ते 12 एप्रिल या अवधीत केलेल्या सर्व्हेमध्ये आढळून आले आहे. जपानमध्ये 45 वर्षांवरील लोकांसाठी लसीकरणाची सुरुवात करण्यात आली असून विदेशातून येणाऱया लसीचा तुटवडा त्यांना भासत आहे. त्यामुळे लसीकरणाचा वेगही थोडासा मंदावला असल्याने व्हायरसची लाट रोखली जाण्याची शक्यता कमी वाटते. लसीकरणाच्या प्रगतीवरही जपानच्या 60 टक्के लोकांनी असमाधान व्यक्त केले आहे.