अनगोळचा तरुण अपघातात ठार

खानापूर : खानापूर-बेळगाव रस्त्यावर गणेबैलजवळ दुचाकीच्या झालेल्या अपघातात एकजण जागीच ठार तर एकजण गंभीर जखमी झाल्याची घटना सोमवारी दुपारी 3 वाजता घडली. या अपघातात जागीच ठार झालेले योगेश महादेव मण्णूरकर (वय 38) तर जखमी नारायण पेदारी कर्लेकर रा. बाबले गल्ली अनगोळ-बेळगाव हे आपल्या अॅक्टीव्हा केए 22-ईआर-7442 या दुचाकीवरून नातेवाईकांच्या लग्नासाठी बेकवाड येथे गेले होते. लग्न आटोपून परतत असताना गणेबैल-इदलहोंडनजीक दुचाकीच्या अपघातात योगेश मण्णूरकर हे पुलावरून खाली पडले. त्यांच्या डोकीला जबर मार बसल्याने ते जागीच ठार झाले. तर दुचाकीवर मागे बसलेले नारायण कर्लेकर हे गंभीर जखमी झाले असून त्यांना उपचारासाठी बेळगाव येथील खासगी रुग्णालयात दाखल करण्यात आले आहे. खानापूर पोलीस घटनास्थळी दाखल झाल्यानंतर मृतदेह शवविच्छेदनासाठी खानापूर येथील सरकारी दवाखान्यात हलविला. अपघाताचे कारण समजू शकले नाही. याबाबत खानापूर पोलीस अधिक तपास करत आहेत. योगेश हे सेंट्रिंग काम करत होते. मृत योगेश मण्णूरकर यांच्या पश्चात पत्नी, एक मुलगा, एक मुलगी, दोन भाऊ, भावजया असा परिवार आहे.