एरियाना ग्रांडे होणार विभक्त

प्रसिद्ध अमेरिकन गायिका आणि अभिनेत्री एरियाना ग्रांडे घटस्फोट घेणार आहे. तिने विवाहाच्या दोन वर्षांनीच गोमेझपासून वेगळे होण्याचा निर्णय घेतला आहे. ब्रेक अप विथ योर गर्लप्रेंड, कॉज आय अॅम बोर आणि 7 रिंग्स यासारख्या गाण्यांसाठी प्रसिद्ध एरियानाने 2021 मध्ये संसार थाटला होता. परंतु नात्यांमध्ये दुरावा निर्माण झाल्याने एरियाना आणि डाल्टनने परस्पर सहमतीद्वारे विभक्त होण्याचा निर्णय घेतला असून न्यायालयात घटस्फोटासाठी अर्जही केला आहे. एरियाना आणि डाल्टनने स्वत:च्या अर्जात ‘दूर करता न येणाऱ्या मतभेदां’चा दाखला दिला आहे. एरियाना आणि डाल्टनने न्यायालयात जाण्यापूर्वी परस्पर मतभेद दूर करण्याचा प्रयत्न केला होता. परंतु विभक्त होणेच चांगले असे दोघांचेही मत झाले. दोघांनीही एका करारावर स्वाक्षरी केली आहे. एरियाना नाते संपुष्टात आणण्याच्या बदल्यात डाल्टनला मोठ्या रकमेचा धनादेश भरपाई म्हणून देणार आहे. दोघांनीही जुलै महिन्यातच विभक्त होण्याची घोषणा केली होती. परंतु घटस्फोटाचा अर्ज सप्टेंबर महिन्यात दाखल केला आहे. एरियाना आणि डाल्टन दोघेही आज देखील परस्परांचा मोठा आदर करतात असे दोघांच्याही निकटवर्तीयांकडून सांगण्यात आले. ग्रॅमी पुरस्कार विजेती एरियाना स्वत:चा चित्रपट ‘क्विड’साठी लंडन येथे गेली होती. त्यानंतरच दोघांच्याही नात्यांमधील अंतर वाढू लागले होते. एरियाना आणि डाल्टनने जानेवारी 2020 मध्ये डेटिंगला सुरुवात केली होती. त्याच वषीं मे महिन्यात दोघांनी स्वत:च्या नात्याची घोषणा केली होती. तर 15 मे 2021 रोजी दोघांनी विवाह केला होता.