मोपा विमानतळावर लवकरच ‘ब्ल्यू टॅक्सी’ सेवा सुरू होणार

पणजी : मोपा आंतरराष्ट्रीय विमानतळावर लवकरच ब्ल्यू टॅक्सी सेवा सुरू होणार असून चालकांना त्यासाठी दोन आठवडे प्रशिक्षण देण्यात येणार असल्याची माहिती वाहतूकमंत्री माविन गुदिन्हो यांनी दिली आहे. ते म्हणाले की पहिल्या टप्प्यात 160 टॅक्सींसह सेवा सुरू होणार असून त्यांना अॅप आधारित टॅक्सी सेवेत सामील होण्याचे स्वातंत्र्य देण्यात आले आहे. ब्ल्यू टॅक्सीवाले कोणत्याही अॅप सेवेत जाऊ शकतात. त्यांच्यावर कसलेही बंधन नाही. प्रथम प्रीपेड टॅक्सी सेवा चालू करणार असून नंतर टॅक्सीचालक अॅप सेवा घेऊ शकतात. त्यांना ‘बॅच’ची सक्ती करण्यात येणार असून दोन आठवड्यांचे प्रशिक्षणही बंधनकारक असल्याचे गुदिन्हो यांनी स्पष्ट केले. प्रशिक्षण त्यांच्यासाठी महत्त्वाचे असून प्रवासी, पर्यटक यांच्याशी कसे वागावे याचे धडे चालकांना देण्यात येणार आहेत. त्या शिवाय सिग्नलांची माहिती त्यांना असणे आवश्यक आहे. त्या प्रशिक्षणाचा त्यांना मोठा फायदा मिळणार असून केंद्रीय वाहतूकमंत्री नितीन गडकरींकडून ‘टॅक्सी पात्रांव, म्हाजी बस’ या योजनेचे कौतुक झाले असल्याचे गुदिन्हो यांनी नमूद केले. टॅक्सी व्यवसायात गोमंतकीयांना प्राधान्य देण्यात येत असून ‘गोवा माईल्स’ चे दर कमी असल्याने ग्राहकांकडून त्यांना मागणी अधिक असल्याने त्यांचा व्यवसाय चांगला होत आहे. गोवा माईल्सचे चालक महिन्यास रु. 50,000 ते रु. 70,000 कमावतात, असेही गुदिन्हो यांनी सांगितले.