रशियाचे विदेशमंत्री शिखर परिषदेत सहभागी होणार
► वृत्तसंस्था/ नवी दिल्ली
रशियाचे राष्ट्राध्यक्ष व्लादिमीर पुतीन यांनी सोमवार, 28 ऑगस्ट रोजी पंतप्रधान मोदींशी दूरध्वनीवरून संभाषण केले. यावेळी द्वयींमध्ये जी-20 शिखर परिषदेवर चर्चा झाल्याची माहिती पीएमओकडून देण्यात आली. तसेच ब्रिक्सच्या विस्तारासह दक्षिण आफ्रिकेत नुकत्याच झालेल्या ब्रिक्स परिषदेत झालेल्या करारांच्या महत्त्वावरही दोन्ही नेत्यांमध्ये बोलणे झाले.
रशियाचे अध्यक्ष व्लादिमीर पुतीन यांच्याशी बोलताना पंतप्रधान नरेंद्र मोदी यांनी द्विपक्षीय सहकार्याच्या अनेक मुद्द्यांवर प्रगतीचा आढावा घेतल्याचे पीएमओने म्हटले आहे. मोठ्या प्रमाणावर ऊर्जा प्रकल्प राबविण्याचा, लॉजिस्टिक पायाभूत सुविधांचा विस्तार करण्याचा दोन्ही नेत्यांचा मानस आहे. दोन्ही देशांमधील अंतराळ सहकार्य विकसित करण्याच्या इराद्यालाही गती देण्यात आली.
रशियाचे अध्यक्ष पुतीन यांनी 9-10 सप्टेंबर 2023 रोजी नवी दिल्ली येथे होणाऱ्या जी-20 शिखर परिषदेला उपस्थित राहण्यास असमर्थता व्यक्त केली आहे. या शिखर परिषदेत परराष्ट्र मंत्री सर्गेई लावरोव रशियाचे प्रतिनिधित्व करतील. रशियाच्या निर्णयाशी सहमती दर्शवत पंतप्रधानांनी भारताच्या जी-20 अध्यक्षतेखालील सर्व उपक्रमांना रशियाने सातत्याने पाठिंबा दिल्याबद्दल राष्ट्राध्यक्ष पुतीन यांचे आभार मानले.
