झाडशहापूर येथे उद्यापासून दमा रुग्णांना मोफत आयुर्वेदिक औषध

किणये : झाडशहापूर येथे मंगळवार दि. 6 रोजी दुपारी 12 वाजल्यापासून व दि. 8 रोजीपर्यंत दम्याच्या रुग्णांना मोफत आयुर्वेदिक औषध देण्यात येणार आहे. गेले कित्येक वर्षापासून आयुर्वेदिक डॉक्टर कै. यल्लाप्पा नंदिहळळी हे दम्याचे रुग्णांना मृग नक्षत्रावर आयुर्वेदिक मोफत औषध देत होते. त्या औषधाचा गुणही चांगला येत होता. त्यामुळे हे औषध घेण्यासाठी येणाऱ्या रुग्णांची संख्या अधिक आहे. वडिलांच्या निधनानंतर आपल्या वडिलांची ही आयुर्वेदिक औषध देण्याची परंपरा कायम ठेवण्याचा संकल्प त्यांची कन्या पूजा सूर्यवंशी यांनी केली आहे. त्यानुसार त्या दरवर्षी मृग नक्षत्राच्या आधी दोन दिवस हे दम्याच्या रुग्णांसाठी मोफत औषध देण्याचे कार्य करतात.पूजा सूर्यवंशी या सध्या नाशिक येथे राहतात. मात्र वडिलांकडून त्यांनी दम्याच्या रुग्णांना कोणते आयुर्वेदिक औषध दिले जाते. ही माहिती वडिलांकडून जाणून घेतली आहे. त्यामुळे वडिलांनी सुरू केलेल्या या परंपरेमध्ये खंड पडू नये व गरजू रुग्णांना मोफत आयुर्वेदिक औषध मिळावे, या उद्देशाने त्या हा उपक्रम पुढे चालवीत आहेत. दि. 6 रोजी दुपारी 12 वाजल्यापासून रात्री आठ वाजेपर्यंत. बुधवारी सकाळी 8 पासून रात्री 8 पर्यंत व गुरुवारी सकाळी 8 वाजल्यापासून सायंकाळी 6:50 पर्यंत पूजा सूर्यवंशी या दमा रुग्णांना आयुर्वेदिक औषध देणार आहेत. दि. 8 रोजी सायंकाळी 6:52 मिनिटांनी मृग नक्षत्राला सुरुवात होणार आहे. या मृग नक्षत्राच्या मुहूर्तावर सदर आयुर्वेदिक दम्याचे औषध रुग्णांनी घ्यावयाचे आहे. बाहेरगावाहून औषधसाठी येणाऱ्या रुग्णांची सोय व्हावी, त्यांना हे औषध मिळावे यासाठी दोन दिवस आधीपासून हे औषध देण्यात येणार आहे. दम्याच्या रुग्णांनी सदर औषधाचा लाभ घ्यावा. झाडशहापूर येथून हे औषध घेऊन जावे आणि मृग नक्षत्राच्या मुहूर्तावर हे आयुर्वेदिक औषध घ्यावे, असे पूजा सूर्यवंशी यांनी कळविले आहे.