पुणे / प्रतिनिधी :
श्रीमंत दगडूशेठ हलवाई गणपती ट्रस्टने यंदा लवकर मिरवणुकीत सहभागी होण्याचा निर्णय घेतला असला, तरी अखिल मंडई मंडळ, श्रीमंत भाऊसाहेब रंगारी गणपती मंडळ, हुतात्मा बाबू गेनू गणपती मंडळ, जिलब्या मारुती गणपती मंडळ ट्रस्ट आदी प्रमुख मंडळांनी नियोजित वेळेत म्हणजेच सायंकाळी 6 नंतरच विसर्जन मिरवणुकीत सहभाग घेण्याची भूमिका घेतली आहे. कार्यकर्ते आणि भाविकांच्या भावना विचारात घेऊन दरवर्षीप्रमाणेच यंदाही नियोजित वेळेत विसर्जन मिरवणुकीत सहभागी होणार असल्याची माहिती अखिल मंडई मंडळाचे अध्यक्ष अण्णा थोरात यांनी पत्रकार परिषदेत दिली.
या पत्रकार परिषदेला श्रीमंत भाऊसाहेब रंगारी गणपती ट्रस्टचे उत्सव प्रमुख पुनीत बालन, हुतात्मा बाबू गेनू गणपती मंडळ ट्रस्टचे बाळासाहेब मारणे, श्री जिलब्या मारुती मंडळ ट्रस्टचे भूषण पंडय़ा आदी उपस्थित होते.
थोरात म्हणाले, पोलीस आणि प्रशासनाला सहकार्य करीत सर्व शिस्त पाळून लवकरात लवकर विसर्जन मिरवणूक संपविण्याचा सर्व मंडळांचा प्रयत्न राहील. दरवर्षीच्या नियोजित वेळेपेक्षा आधी निघणे मंडळांना शक्य होत नाही. मानाच्या गणपती मंडळांच्या मिरवणुकीनंतर इतर गणपती मंडळे लक्ष्मी रस्त्याने मिरवणुकीमध्ये मार्गस्थ होतात. त्यामुळे ती मंडळे पुढे जाईपर्यंत इतर मंडळांना लवकर जाणे शक्य नाही. त्याकरिता आम्ही नेहमीच्या वेळेतच सहभागी होणार आहोत.
शिस्त पाळत विसर्जन मिरवणूक
पुनीत बालन म्हणाले, विसर्जन मिरवणुकीकरिता सायंकाळी सहभागी होत असलेल्या प्रमुख मंडळांनी केलेली सजावट व विद्युत रोषणाई हे सायंकाळनंतरचे मिरवणुकीचे मुख्य आकर्षण असते. ते पाहण्यासाठी लाखो भाविक देशभरातूच नव्हे, तर जगभरातून येतात. त्यामुळे त्या सर्वांच्या भावनांचा विचार करता ठरलेल्या वेळेतच सायंकाळी मिरवणुकीत सहभागी होणार आहोत. तसेच सर्व प्रकारची शिस्त पाळत विसर्जन मिरवणूक होईल. मारणे म्हणाले, हुतात्मा बाबू गेनू गणपती मंडळाची सजावट व विसर्जन रथ हे आकर्षण असते. त्यामुळे दरवषीप्रमाणेच मंडळ यंदा देखील सायंकाळी मिरवणुकीत सहभागी होणार आहे. उत्सव मंडपापासून सायंकाळी 6.45 वाजता आरती करून विसर्जन मिरवणुकीत मंडळ सहभागी होईल.
मिरवणूक वेळेत संपवण्यावर भर
पंडय़ा म्हणाले, श्री जिलब्या मारुती गणपती मंडळ सायंकाळी 6.30 नंतर मिरवणुकीत सहभागी होणार आहे. दरवर्षीप्रमाणे यंदाही आमच्या मंडळामागे हुतात्मा बाबू गेनू गणपती, भाऊ रंगारी गणपती आणि त्यापाठोपाठ अखिल मंडई मंडळ विसर्जन मिरवणुकीत सहभागी होईल. भाविकांच्या भावना विचारात घेऊन हा निर्णय घेण्यात आला आहे. आम्ही सर्व शिस्त पाळून मिरवणूक लवकर संपविण्याकरिता सहकार्य करणार असल्याचे त्यांनी सांगितले.
दगडूशेठसोबत जाणे प्रॅक्टिकली शक्य नाही
दरम्यान, यंदा प्रथमच दगडूशेठ गणपतीने दुपारी चार वाजता मिरवणुकीत सहभागी होण्याचा निर्णय घेतला आहे. मात्र, आम्हाला त्यांच्यासोबत चार वाजता निघणे प्रॅक्टिकली शक्य नाही, असेही या वेळी सांगण्यात आले.
