सांगली : प्रतिनिधी
अहमदनगर जिल्ह्यतील नेवासा तालुक्यातील एका अल्पवयीन मुलीचे अपहरण करून तिच्या कुटुंबियांना प्रशासनाने नाहक त्रास दिल्याचा आरोप भाजप नेते गोपीचंद पडळकर यांनी केला आहे. याच्या निषेधार्थ आंदोलन करण्याचा इशारा पडळकरांनी सोशल मिडीयाच्या माध्यमातून दिला आहे.
दरम्यान, मुलीला सुखरूप आई वडिलांकडे सुपूर्द करण्याच्या कारवाईसाठी आदेश द्यावेत अशी विनंती गृहमंत्री दिलीप वळसे पाटील यांना केली.
सोशल मिडीयावर बोलताना पडळकर म्हणाले, “आम्हा धनगरांची पोरगी तीचं नगर जिल्ह्यातल्या नेवासा तालुक्यातील अंतरवाली या गावातून अपहरण करण्यात आले आहे. तिच्या आई वडीलांनी ६ मे २०२२ रोजी तक्रार दाखल केल्यानंतर पीआय बाजीराव पवार यांनी घटनेची चौकशी करण्यासाठी आई-वडीलांना अश्लील शिवीगाळ करित दमदाटी करून १ लाख पंचवीस हजार रूपये वसूल केले आहेत.” “सदर बाब ही पोलीस अधीक्षकांना सांगितल्यानंतर तसा त्यांनी तक्रारकर्त्यांचा जवाबपण नोंदविलेला आहे.”
अपह्रत मुलीला सुखरूप आई वडिलांच्याकडे सुपूर्द करण्याचे आदेश द्यावेत. तसेच संबंधित अधिकाऱ्याला तात्काळ निलंबित करण्याची मागणी पडळकरांनी गृहमंत्र्यांकडे केली आहे.