बेळगाव – सर्व शेतकऱ्यांची समस्या असल्यास यडवाल शिवारातील महत्त्वाच्या कच्च्या संपर्क रस्त्याचे विकास काम तत्काळ युद्ध पातळीवर हाती घेण्यात येईल असे आश्वासन बेळगाव उत्तरचे आमदार अनिल बेलके यांनी दिले आहे. अलारवाड क्रॉस नजीक असलेल्या यडवाल शिवारातील कच्च्या रस्त्याला भेट देऊन पाहणी केल्यानंतर ते बोलत होते. सदर शिवारात शेतजमीन असलेल्या शेतकऱ्यांनी गेल्या सोमवारी आमदार अनिल बेनके यांची भेट घेऊन आपल्या शिवारातील सुमारे दोन ते अडीच किलोमीटर अंतराच्या कच्च्या संपर्क रस्त्याचे डांबरीकरण अथवा कॉंक्रिटीकरण करावे अशी मागणी केली होती. तसेच आपल्या मागणीचे निवेदन आमदारांना सादर केले होते. त्यावेळी दिलेल्या आश्वासनानुसार आमदार अनिल बेनके यांनी आज बुधवारी दुपारी यडवाल शिवाराला भेट देऊन तेथील कच्च्या संपर्क रस्त्याची पाहणी केली.