मांजरी : पश्चिम महाराष्ट्रातील पाणलोट क्षेत्रात सुरू असलेल्या पावसामुळे कृष्णा नदीला मिळणाऱ्या पंचगंगा, दुधगंगा, वेदगंगा या नद्यांच्या पाणी पातळीत वाढ झाली आहे. त्यामुळे कृष्णा नदीच्या पाणी पातळीत दोन दिवसात प्रचंड प्रमाणात वाढ झाली.
जुलै महिण्यात झालेल्या पावसाने पाणी पातळी संथ गतीने वाढली होती यावेळी मात्र नदीकाठावरील माळी भाग एका दिवसात पाण्याखाली गेला. सर्वत्र पावसाचा जोर वाढल्याने नदी-नाले तुडुंब भरून वाहू लागले आहेत.
मळी भाग व पोटमळी मधील चारा पिके, गवत पुन्हा पाण्याखाली गेले. त्याचप्रमाणे नदीला जोडणाऱ्या ओढे व नाल्यांच्या पाणी पात्रातही पाणी शिरल्याने ओढे, नाले काठावरील पिकेही पाण्याखाली गेली आहेत. नदीपात्रातील पाणी जलदगतीने काठावर पसरत असून ओढे व नाले पात्रात मात्र संथ गतीने पाणी पातळी वाढत आहे.
सध्या पश्चिम महाराष्ट्र, कोकण तसेच पाणलोट क्षेत्र व उपनद्या विभागात पावसाची रिपरिप थोडी कमी झाली असली तरी नदीपात्रात कृष्णा व तिच्या उपनद्यांच्या पाण्याचा प्रवाह जोरदारपणे येत असून कृष्णा नदी दुथडी भरून वाहत आहे. विविध धरणाच्या पाणी साठ्यात वाढ झाल्याने पाण्याचा विसर्ग वाढवण्यात आला आहे. त्यामुळे पाणी पात्राबाहेर पडले असून शेती वस्तीतील रस्ते पाण्याखाली जात आहेत.
मागील महिण्यात आलेल्या पुरात वीटभट्टी परीसरात पाणी शिरले होते. आता पुन्हा वीटभट्टी परीसरात पाणी घुसल्याने नदी पात्राला प्रचंड जलाशयाचे स्वरूप प्राप्त झाले आहे.