कोल्हापूर प्रतिनिधी
खासदार धैर्यशील माने यांच्या मागणीवरून कोल्हापूर- शिरोली- सांगली या रस्त्याच्या चौपदरीकरणासाठी लागणाऱ्या भु-संपादनाचा मार्ग मोकळा झाला आहे.त्यामुळे लवकरच या रस्त्याच्या प्रत्यक्ष कामास सुरवात होणार असल्याची माहीती खासदार धैर्यशील माने यांनी दिली आहे.
अधिक माहीती देताना खासदार धैर्यशील माने म्हणाले, “शिरोली- सांगली हा रस्ता केंद्रीय दळणवळण व वाहतूक मंत्री नितीन गडकरी यांच्याकडून नॅशनल हायवे ॲथॉरिटी ऑफ इंडियाकडे वर्ग करून घेतला आहे. त्या रस्त्यास राष्ट्रीय महामार्ग क्रमांक १६६ हा नंबर देण्यात आला आहे. सदर रस्ता राष्ट्रीय महामार्ग प्राधिकरण कडे वर्ग झाल्यानंतर या रस्त्याच्या चौपदरीकरणाच्या कामासाठी राष्ट्रीय महामार्ग प्राधिकरण चे अधिकाऱ्यांच्याकडून सर्वे करून त्याचा डीपीआर बनवण्यात आलेला आहे.”
पुढे बोलताना ते म्हणाले, “या डी.पी.आर नुसार रस्त्याच्या प्रत्यक्ष कामात सुरुवात करण्यासाठी काही प्रमाणात भूसंपादन करावे लागत होते. त्या भूसंपादनासाठी रस्त्याच्या पुढचे काम बरेच दिवस अंतिम मंजुरीसाठी प्रलंबित आहे. ही बाब लक्षात घेवून खासदार धैर्यशील माने यांनी संसदेच्या विशेष अधिवेशनासाठी दिल्लीमध्ये असताना नॅशनल हायवे अथॉरिटी ऑफ इंडियाचे चेअरमन संतोष कुमार यादव यांची भेट घेऊन सांगली कोल्हापूर रस्त्याच्या भूसंपादनच्या प्रलंबित प्रस्तावास त्वरित मंजुरी देऊन प्रत्यक्ष कामात सुरुवात करावी अशी लेखी पत्राद्वारे मागणी केली होती.” अशी माहीती त्यांनी दिली.
खासदार माने यांच्या मागणीवरून नॅशनल हायवे अथॉरिटी ऑफ इंडिया कडून सदर रस्त्याच्या भूसंपादनाच्या प्रस्तावास नुकतीच मंजुरी मिळाली आहे.त्यामुळे बरीच वर्षे प्रलंबित असलेल्या शिरोली सांगली या रस्त्याच्या चौपदरीकरणाच्या कामास भूसंपादन होऊन प्रत्यक्ष कामास लवकरच सुरुवात होईल असे खासदार धैर्यशील माने यांनी सांगितले.
