बेळगाव-म्हैसूर एक्स्प्रेसचा शुभारंभ

बेळगाव : धारवाड-म्हैसूर (रेल्वे क्र. 17302) एक्स्प्रेस आता बेळगावपर्यंत धावणार आहे. मंगळवारी बेळगाव रेल्वेस्थानक येथे या एक्स्प्रेसचा शुभारंभ करण्यात आला. खासदार मंगला अंगडी व कर्नाटक राज्याचे दिल्लीतील विशेष प्रतिनिधी प्रकाश हुक्केरी यांच्या हस्ते उद्घाटन करण्यात आले. यामुळे आता रात्रीच्या वेळीही बेळगावमधून म्हैसूरला जाण्यासाठी रेल्वे उपलब्ध होणार आहे. प्रकाश हुक्केरी म्हणाले, रेल्वेच्या वेळापत्रकात बदल केल्यास याचा फायदा प्रवाशांना होणार आहे. म्हैसूरवरून रात्री 10 पेक्षा लवकर रेल्वे सोडावी त्यामुळे सकाळी लवकर रेल्वे बेळगावला पोहोचेल, अशा सूचना त्यांनी मांडल्या. खासदार मंगला अंगडी यांनी वंदे भारत एक्स्प्रेस सुरू करण्यासाठी आपले प्रयत्न सुरू असल्याचे सांगत रेल्वेच्या विकासासाठी आपण कायम प्रयत्नशील राहू, असे आश्वासन दिले. येत्या काही दिवसात दसऱ्याला सुरुवात होईल. म्हैसूर येथे मोठ्या उत्साहात दसरा साजरा केला जातो. त्यामुळे बेळगावमधील नागरिकांना आता दसरा उत्सवाला उपस्थित राहता येईल. यावेळी उपमहापौर रेश्मा पाटील, रेल्वे सल्लागार समितीचे सदस्य प्रसाद कुलकर्णी, नैर्त्रुत्य रेल्वेचे वाणिज्य व्यवस्थापक अरुण साधू, नगरसेवक श्रेयश नाकाडी, डोणी यासह इतर उपस्थित होते. कार्यक्रमाचे सूत्रसंचालन प्रणेश यांनी केले.