बेळगाव : सुटीनिमित्त बेळगावमध्ये आलेल्या विदेशी नागरिकाचे पैसे व महत्त्वाची कागदपत्रे असलेले पाकीट हरवले होते. मात्र, नंतर त्यांना ते पाकीट परत मिळवून देण्यात आले. या कामी दोघांच्या प्रामाणिकपणाचे पोलिसांनी कौतुक केले. मूळचे गुजरात येथील जे. एन. पटेल कामानिमित्त शिकागो येथे राहतात. बेळगावला आपल्या सासरवाडीला ते आले आहेत. मंगळवारी सकाळी खडेबाजार परिसरात दुचाकीवरून जाताना त्यांच्या खिशातील पाकीट रस्त्यावर पडले. त्यानंतर रस्त्यावरून जाणाऱ्या मंजुनाथ कोलेकर व रफिक कच्छी यांनी सापडलेले हे पाकीट खडेबाजार पोलीस स्थानकात आणून दिले. काही काळानंतर पाकीट हरवल्याचे लक्षात येताच पटेलसुद्धा खडेबाजार परिसरात आले. तेथील लोकांनी त्यांना पोलीस स्थानकात चौकशी करा, असे सांगून पाठविले. त्याचवेळी मंजुनाथ व रफीक हेसुद्धा तेथे दाखल झाले. खडेबाजारचे पोलीस निरीक्षक पी. आय. रत्नकुमार, एएसआय जे. आय. देवडी यांनी तत्परता दाखवत मूळ मालकाकडे पाकीट परत केले. या पाकिटामध्ये चार हजार दहा रुपये, दहा-बारा एटीएम कार्ड्स व लायसन्स यासह इतर कागदपत्रे होती. मंजुनाथ कोलेकर व रफीक कच्छी यांनी दाखविलेल्या प्रामाणिकपणाचे कौतुक होत आहे.
Tarun Bharat Portal
Amit Kulkarni a versatile content writer, scriptwriter, and content producer at Tarun Bharat Media. Specializes in sports news, local news entertainment, national news and astrology content. His captivating storytelling and deep industry knowledge make him an expert in crafting engaging narratives.
Add A Comment
