जलद कृती दलाची तुकडीही दाखल : प्रमुख मार्गांवरून पथसंचलन
बेळगाव : गुरुवारी होणाऱ्या श्री विसर्जन मिरवणूक बंदोबस्तासाठी सुमारे दोन हजारहून अधिक पोलीस तैनात करण्यात येणार आहेत. यासाठी जलद कृती दलाची एक तुकडीही बेळगावात दाखल झाली असून सोमवारी सायंकाळी शहरातील प्रमुख मार्गांवरून पथसंचलन झाले. पोलीस आयुक्त एस. एन. सिद्धरामप्पा यांच्या नेतृत्वाखाली श्री विसर्जन मिरवणूक बंदोबस्ताची तयारी करण्यात आली आहे. कायदा व सुव्यवस्था विभागाचे पोलीस उपायुक्त रोहन जगदीश, गुन्हे तपास व वाहतूक विभागाच्या पोलीस उपायुक्त पी. व्ही. स्नेहा आदींसह शहरातील बहुतेक अधिकाऱ्यांनी रोज रात्री शहराचा फेरफटका मारण्यास सुरुवात केली आहे. मिरवणूक पाहण्यासाठी मोठी गर्दी होते. त्यामुळे गणेशभक्तांची गैरसोय होऊ नये, मिरवणूक शांततेत व उत्साहात पार पडावी, यासाठी बंदोबस्ताचे नियोजन करण्यात आले आहे. पोलीस आयुक्तांसह पोलीसप्रमुख दर्जाचे 7 अधिकारी, 25 एसीपी आणि डीएसपी, 70 पोलीस निरीक्षक, 90 पोलीस उपनिरीक्षक, 180 साहाय्यक पोलीस उपनिरीक्षक बंदोबस्तासाठी जुंपण्यात येणार आहेत. राज्य राखीव दलाच्या 10, जिल्हा सशस्त्र दलाच्या 6 तुकड्यांचे बंदोबस्तासाठी नियोजन करण्यात आले असून राज्यातील विविध जिल्ह्यांतून पोलीस बळ मागविण्यात आले आहे, अशी माहिती पोलीस उपायुक्त रोहन जगदीश यांनी दिली. कोणत्याही परिस्थितीत मिरवणूक शांततेत पार पडावी, यासाठी पोलीस दलाने सर्व तयारी केली असल्याचे त्यांनी सांगितले.
350 हून अधिक सीसीटीव्ही कॅमेऱ्यांची नजर
संवेदनशील व अतिसंवेदनशील भागातील हालचालींवर लक्ष ठेवण्यात आले असून उंच इमारतींवरही पोलीस तैनात करण्यात येणार आहेत. संपूर्ण मिरवणुकीवर 350 हून अधिक सीसीटीव्ही कॅमेऱ्यांची नजर असणार आहे. त्याबरोबरच आकाशातून 8 ड्रोनच्या माध्यमातून नजर ठेवण्यात येणार आहे. सोमवारी सायंकाळी झालेल्या पथसंचलनात पोलीस उपायुक्त व शहरातील एसीपी, पोलीस निरीक्षक, उपनिरीक्षक दर्जाच्या अधिकाऱ्यांनी भाग घेतला होता. राणी चन्नम्मा सर्कलपासून पथसंचलनाला सुरुवात करण्यात आली.
