|Tuesday, September 17, 2019
You are here: Home » मनोरंजन » गोष्ट तशी गमतीची नाबाद 400 प्रयोग

गोष्ट तशी गमतीची नाबाद 400 प्रयोग 

आताच्या काळात नाटकांचे मोजके प्रयोग होण्याच्या काळात गोष्ट तशी गमतीची या नाटकाने 400 प्रयोगांचा टप्पा गाठला आहे. दिवाळी पाडव्याच्या दिवशी या नाटकाचा 400 वा प्रयोग पार पडला. महत्त्वाची गोष्ट म्हणजे आतापर्यंत या नाटकात एकही रिप्लेसमेंट झालेली नाही.

सोनल प्रॉडक्शनच्या नंदू कदम यांनी निर्मिती केलेल्या या नाटकाचं लेखन मिहिर राजदा यांनी केलं आहे. तर अद्वैत दादरकर यांचं दिग्दर्शन आहे. शशांक केतकर, मंगेश कदम, लीना भागवत यांच्या यात प्रमुख भूमिका आहेत. या नाटकाद्वारे शशांकने व्यावसायिक रंगभूमीवर पदार्पण केलं होतं. आतापर्यंत या नाटकाला प्रेक्षकांचा भरभरून प्रतिसाद लाभला आहे. जवळपास तीन वर्षांत या नाटकानं 400 प्रयोग केले आहेत. शशांक आणि लीना यांचं 400 प्रयोगांचा टप्पा गाठणारे हे पहिलेच नाटक आहे. अभिजित पेंढारकर यांनी संगीत, अमिता खोपकर यांनी वेशभूषा, प्रदीप पाटील यांनी नेपथ्य आणि रवी करमरकर यांनी प्रकाशयोजना केली आहे. एकही रिप्लेसमेंट न करता 400 प्रयोग करणं ही खरंच मोठी गोष्ट आहे. या नाटकानं समाधान आणि आनंद अशा दोन्ही गोष्टी दिल्या. नाटक पाहिलेल्या प्रेक्षकांना आमचं खरंखुरं कुटुंब वाटतं ही आमच्या कामाची मोठी पावती आहे. चारशे प्रयोग होत असले तरी आम्ही तितक्याच उत्साहाने काम करतो. प्रत्येक प्रयोगात काहीतरी वेगळं करण्याचा प्रयत्न करतो. त्यामुळेच नाटकातला ताजेपणा टिकून राहतो. 400 प्रयोग पूर्ण होणं आनंददायीच आहे, असे अभिनेत्री लीना भागवत यांनी सांगितले.

महाराष्ट्रासह विदेशातही या नाटकाचे प्रयोग झाले आहेत. महाराष्ट्रातल्या प्रेक्षकांना हे नाटक जितकं आपलं वाटतं, तितकंच ते विदेशातल्या प्रेक्षकांनाही वाटतं हेच या नाटकाचं यश आहे, असं मंगेश कदम म्हणाले.