|Sunday, December 15, 2019
You are here: Home » मनोरंजन » प्रेमाची आगळीवेगळी गोष्ट साता जल्माच्या गाठी

प्रेमाची आगळीवेगळी गोष्ट साता जल्माच्या गाठी 

प्रेम ही अडीच अक्षरं नुसती कानावर जरी पडली तरी अनेकांच्या अंत:करणातील तारा छेडल्या जातात. प्रत्येकाच्या मनात त्या खास व्यक्तीबद्दलचा हळवा कोपरा हा असतोच. प्रेमात पडणं जरी सोपं असलं तरी ते निभावणं मात्र कठीण. प्रेमासाठी कायपण करण्याची तयारी असणारे प्रेमवीर अगदी हाताच्या बोटावर मोजावे इतकेच. युवराज त्यापैकीच एक. श्रुतीवर जीवापाड प्रेम करणारा आणि प्रेमासाठी कायपण करायला तयार असणारा. श्रुती आणि युवराजची ही अनोखी लव्हस्टोरी स्टार प्रवाहवर सुरू होणाऱया साता जल्माच्या गाठी या मालिकेतून पाहायला मिळेल. प्रेमाच्या आणाभाका देत सुखी संसाराची स्वप्न पाहणाऱया या दोघांच्याही प्रेमाची गोष्ट वाटते तितकी सोपी नाही बरं का. यांनाही बरीच अग्निदिव्य पार करावी लागणार आहेत. म्हणूनच युवराज श्रुतीची ही प्रेमकहाणी थोडी हटके आहे. सध्या या मालिकेच्या प्रोमोजनी सर्वांचच लक्ष वेधून घेतलं आहे. 23 सप्टेंबरपासून रात्री 8 वाजता स्टार प्रवाहवर ही मालिका प्रसारित होणार आहे.

  या मालिकेविषयी सांगताना स्टार प्रवाहचे कार्यक्रम प्रमुख सतीश राजवाडे म्हणाले, साता जल्माच्या गाठी नावाप्रमाणेच मातीत रुळलेली लव्हस्टोरी आहे. मुख्य म्हणजे साताऱयात घडणारी गोष्ट आहे. त्यामुळे साताऱयातच मालिका शूट होतेय. मालिकेतले बरेचसे कलाकार साताऱयातले आहेत त्यामुळे एक वेगळी भट्टी जमून आलीय. या मालिकेच्या निमित्ताने प्रेक्षकांना एक वेगळी गोष्ट नक्कीच पाहायला मिळेल. श्वेता शिंदेच्या वज्र प्रोडक्शनने या मालिकेची निर्मिती केली आहे. श्वेता मूळची साताऱयाची असल्यामुळे तिचं साताऱयावर विशेष प्रेम आहे. मालिकेसाठी कलाकार आणि ठिकाणाची जुळवाजुळव सुरू असताना सातारा आणि आसपासच्या परिसरातील कलाकारांच्या निवडीवर भर देण्यात आला. मालिकेत दिसणारा दिमाखदार बंगलाही साताऱयाचाच आहे. स्टार प्रवाहसोबत श्वेताचे जुने बंध आहेत. लक्ष्य मालिकेतल्या भूमिकेसाठी श्वेताचं विशेष कौतुक झालं होतं. साता जल्माच्या गाठीच्या निमित्ताने ती निर्माती म्हणून प्रेक्षकांसमोर येणार आहे. या मालिकेच्या निमित्ताने विशाल निकम आणि अक्षया हिंदळकर ही जोडी टेलिव्हिजनवर पदार्पण करत आहे. सातारी भाषेचा लहेजा जपत या दोघांनीही मालिकेची गोडी वाढवलीय.

Related posts: