गोवावेसजवळ अर्धवट स्थितीत रस्ता वाहनधारकांना फटका, अपघाताचा धोका

बेळगाव : स्मार्टसिटी अंतर्गत अर्धवट स्थितीत ठेवण्यात आलेल्या रस्त्यांचा स्थानिक नागरिकांना त्रास सहन करावा लागत आहे. एकीकडे रस्त्यांसाठी कोट्यावधी रुपयांचा निधी खर्ची घालण्यात आला आहे. तर दुसरीकडे रस्त्यांची स्थिती बिकटच आहे. गोवावेस दत्तमंदिरासमोर रस्ता उखडून गेल्याने वाहनधारकांना ये-जा करणे धोकादायक बनू लागले आहे. गोवावेस येथील चौकाजवळ रस्ता अर्धवट स्थितीत सोडण्यात आला आहे. त्यामुळे खडी विखुरली गेली आहे. येथून ये-जा करताना वाहने घसरून अपघात घडू लागले आहेत. परिणामी वाहतुकीची कोंडीदेखील होऊ लागली आहे. त्यामुळे गोवावेसजवळील रस्ता वाहनधारकांसाठी त्रासदायक ठरू लागला आहे. शहरात अनेक ठिकाणी स्मार्टसिटी अंतर्गत रस्ते अर्धवट स्थितीत ठेवण्यात आले आहेत. ठेकेदाराच्या दुर्लक्षामुळे की निधीची कमतरता जाणवू लागली आहे? असा प्रश्नदेखील पडू लागला आहे. येथील वाहतुकीला यामुळे धोका निर्माण झाला आहे.या मार्गावर शहरांतर्गत आणि राज्यांतर्गत वाहनांची संख्या अधिक आहे. मात्र, रस्ता अर्धवट स्थितीत असल्याने वाहतुकीसाठी अडचणीचा ठरू लागला आहे.