रत्नागिरी, प्रतिनिधी
Nilima Chavan Suicide Case : चिपळूण तालुक्यातील निलिमा चव्हाण मृत्यू प्रकरणी पोलिसांनी निलिमा काम करत असलेल्या बॅंकेतील प्रोजेक्ट मॅनेजर संग्राम गायकवाड याला निलिमावर कामाचे प्रेशर आणून आत्महत्येस प्रवृत्त केल्याचा गुन्हा दाखल करून गुरूवारी रात्री अटक केली आहे. १ ऑगस्ट २०२३ रोजी दाभोळच्या खाडीत नीलिमा चव्हाण हिचा मृतदेह आढळला होता. या प्रकरणी दाभोळ पोलीस स्टेशन येथे अकस्मात मृत्यू म्हणून नोंद करण्यात आली होती. याचा अधिक तपास दापोली पोलीस करत होते.
आजवरच्या तपासात नीलिमा हिच्या व्हिसेरा ची डॉक्टरांनी सामान्य व विशिष्ट रासायनिक चाचणी केली होती त्या रिपोर्टमध्ये कोणत्याही प्रकारचे वीष दिसून आले नसल्याचे नमूद करण्यात आले आहे. तसेच मृत्यूचे अंतिम कारण हे बुडल्यामुळे गुदमरून मृत्यू झाल्याचे नमूद केले आहे.तसेच पोलीसांमार्फत चिपळूण,खेड व दापोली येथील एसटी स्थानक,रेल्वे स्थानक व इतर ठिकाणचे सीसीटीव्ही फुटेजची पडताळणी करण्यात आली.यात पोलीस यंत्रणेला संशयास्पद असं काही आढळून आले नाही. या अकस्मात मृत्यूचा पोलीस तपास सुरू असताना 17 ऑगस्ट 2023 रोजी चिपळूण पोलीस ठाण्यात.आत्महत्या करण्यास चिथावणी देऊन प्रवृत्त केल्याबाबत निलिमा चव्हाण हिचे वडील सुधाकर तुकाराम चव्हाण यांनी फिर्यादी दिली.
या फिर्यादीमध्ये सुधाकर तुकाराम चव्हाण यांनी आपली मुलगी दापोली येथील ज्या बँकमध्ये काम करत होती त्या ठिकाणी असणाऱ्या प्रोजेक्ट मॅनेजर संग्राम गायकवाड मुळ (रा.कोल्हापुर), हा निलिमा हिला ऑफिसमध्ये तिच्या कामाबाबत 15 दिवसांचे टार्गेट पूर्ण करण्यासाठी तिला वारंवार सुट्टीवर असतानादेखील फोन करत होता.आपल्या मुलीस दिवसाला 4-5 डी-मॅट खाती उघडण्यासाठी जाणून बुजून दबाव आणत होता तसेच मॅनेजर संग्राम गायकवाड याने नीलिमा नोकरीला लागल्यापासूनच तिच्यावर टार्गेट पूर्ण करण्याचा दबाव आणला होता व नीलिमाने आपला प्रामाणिक प्रयत्न करून देखील तिला काम जमत नसल्याचे बोलून,कामावरून काढून टाकण्याबाबत धमकी दिली होती व यातूनच ती चिंताग्रस्त झाली होती.या कारणांमुळे निलिमा चव्हाण हिने आत्महत्या केली असल्याचे म्हटले आहे.
सुधाकर तुकाराम चव्हाण यांनी दिलेल्या फिर्यादी नुसार दाभोळ पोलीस ठाणे येथे आत्महत्या करण्यास चिथावणी देऊन प्रवृत्त केल्याबाबत गुन्हा दाखल करून संशयित संग्राम सुरेश गायकवाड,(26, मुळ राहणार कोडोली, तालुका पन्हाळा, जिल्हा कोल्हापूर) , सध्या राहणार.टी.आर.पी,रत्नागिरी याच्यावर गुन्हा दाखल करून १७ ऑगस्ट २०२३ रोजी रात्री अटक केली. याप्रकरणी अधिक तपास पोलीस करत आहेत.
