ऑनलाईन टीम / तरुण भारत :
दिल्लीच्या एका वृद्ध महिलेने पुणे विमानतळ बॉम्बने उडवून देण्याची धमकी दिली. त्यामुळे विमानतळावर खळबळ उडाली. मात्र, ही अफवा असल्याचे स्पष्ट झाल्यानंतर पुणे पोलिसांनी या महिलेवर गुन्हा दाखल केला आहे.
नीता प्रकाश कृपलानी (वय 72, रा. सूर्यविहार, गुडगाव इंडस्ट्रियल कॉम्प्लेक्स, दिल्ली) असे गुन्हा दाखल झालेल्या महिलेचे नाव आहे. या प्रकरणी महिला पोलीस कर्मचारी दीपाली बबनराव झावरे (रा. कलवड वस्ती, लोहगाव, पुणे) यांनी फिर्याद दिली आहे.
पोलिसांनी दिलेल्या माहितीनुसार, नीता कृपलानी ही महिला गुरुवारी दुपारी अडीच वाजण्याच्या सुमारास पुणे विमानतळावर आली. तिने बुथमध्ये डय़ुटीवर असलेल्या पोलिसांना “मेरे चारों तरफ बम लगा है, मैं एअरपोर्ट उडानेवाली हूँ,” असे सांगितले. त्यानंतर पोलिसांची धांदल उडाली. दरम्यान, महिला पोलीस कर्मचाऱ्यांनी या महिलेची झडती घेतली असता ती अफवा असल्याचे स्पष्ट झाले. त्यानंतर या महिलेवर विमानतळ पोलीस ठाण्यात गुन्हा दाखल करण्यात आला. पुढील तपास पोलीस उपनिरीक्षक एस. आर. करपे करीत आहेत.
