लांजा : मुंबई-गोवा राष्ट्रीय महामार्गावरील वेरळ येथे असणाऱ्या हॉटेल अनमोलचे मालक अनिरुद्ध कांबळे यांना 16 ऑक्टोबर रोजी रात्री 12.30 च्या सुमारास खवले मांजर दिसले. महामार्गावरील वाहनांच्या वर्दळीमुळे खवले मांजर रस्त्यावरुन हालत नसल्याचे कांबळे यांच्या लक्षात आले. त्यांनी ते खवले मांजर आपल्या हॉटेलमध्ये आणून ठेवले व या संदर्भात उद्योजक किरण सामंत यांना कळविले.
यानंतर सामंत यांनी तत्काळ विभागीय वनाधिकारी रत्नागिरी (चिपळूण) यांना घटनेची माहिती दिली. विभागीय वनाधिकारी रत्नागिरी (चिपळूण) यांच्या आदेशानुसार लांजा येथील वनपाल व इतर कर्मचारी यांनी घटनास्थळी जावून माहिती घेतली. त्यावेळी वेरळ येथे सापडलेल्या खवले मांजरला कोणत्याही प्रकारे जखम झाली नसल्याची खात्री करून वनपाल यांनी तिला ताब्यात घेतले. दरम्यान, लांजा पशुवैद्यकीय अधिकारी यांच्यामार्पत खवले मांजरची तपासणी करून ते सुस्थितीत असल्याने तिला नैसर्गिक अधिवासात सोडण्यात आले. ही कार्यवाही विभागीय वनाधिकारी दीपक खाडे व सहाय्यक वनसरंक्षक सचिन निलख, रत्नागिरी (चिपळूण) यांच्या आदेशानुसार रत्नागिरी वनपरिक्षेत्र अधिकारी प्रकाश सुतार, यांच्या मार्गदर्शनाखाली लांजा येथील वनपाल दिलीप आरेकर व वनरक्षक विक्रम पुंभार यांनी पार पाडली.
या बाबतीत पुढील तपास सुरु असून वन्यप्राणी मनुष्यवस्तीत आढळल्यास किंवा संकटात सापडल्याचे निदर्शनात आल्यास त्या संबंधी वनविभागाचे 1926 या हेल्पलाईन क्रमांकाशी संपर्प साधण्याचे आवाहन परिक्षेत्र वनाधिकारी प्रकाश सुतार यांनी केले आहे.
