वृत्तसंस्था/ सेंट जोन्स (ऍटीग्वा)
विंडीजचा माजी कसोटी क्रिकेटपटू तसेच निवड समिती सदस्य रामनरेश सरवानने आपल्या पदाचा राजीनामा दिला असल्याची माहिती क्रिकेट विंडीजने दिली आहे. विंडीजच्या राष्ट्रीय पुरूष तसेच युवा निवड समिती सदस्य म्हणून सरवानने आपली भूमिका बजावली होती. काही वैयक्तिक समस्यामुळे सरवानने निवड समिती सदस्यपदाचा राजीनामा दिला असल्याचे क्रिकेट विंडीजच्या प्रवक्त्याने सांगितले.
6 जानेवारी 2022 रोजी रामनरेश सरवानची विंडीजच्या क्रिकेट निवड समिती सदस्यपदी तसेच युवा निवड समितीमध्ये नियुक्ती करण्यात आली होती. आता सरवानच्या जागी माजी क्रिकेटपटू रॉबर्ट हेन्सची हंगामी नियुक्ती करण्यात आली आहे. रॉबर्ट हेन्स वेंडीजच्या युवा निवड समिती पॅनेलमध्ये विद्यमान प्रमुख सदस्य असून तो विंडीज निवड समितीचा माजी हंगामी चेअरमनही होता. विंडीजच्या क्रिकेट निवड समितीमध्ये डेस्माँड हेन्स हे सदस्य असून फिल सिमॉन्स प्रमुख प्रशिक्षक आहेत. क्रिकेट विंडीजचे संचालक जिमी ऍडॅम्स यांनी रामनरेश सरवानच्या विंडीज क्रिकेट क्षेत्रातील योगदानाबद्दल आभार मानले आहेत. विंडीजचा क्रिकेट संघ सध्या हॉलंडच्या दौऱयावर असून उभय संघात पहिल्यांदाच वनडे मालिका खेळविली जाणार आहे.