वृत्तसंस्था/ मुंबई
भारतीय भांडवली बाजारात सप्ताहातील अंतिम दिवशी शुक्रवारी बीएसई सेन्सेक्स आणि एनएसई निफ्टी यांचे निर्देशांक वधारुन बंद झाले आहेत. यामध्ये कॅपिटल गुड्स, ऑईल अॅण्ड गॅस व पॉवर यांच्या कामगिरीने भारतीय बाजारात तेजीचा माहोल कायम राहिल्याचे दिसून आले आहे.
दिग्गज कंपन्यांच्या मदतीने बीएसई सेन्सेक्स दिवसअखेर 333.35 अंकांनी वधारुन निर्देशांक 0.50 टक्क्यांसोबत 66,598.91 वर बंद झाला आहे. दुसऱ्या बाजूला राष्ट्रीय शेअर बाजाराचा निफ्टी दिवसअखेर 92.90 अंकांच्या तेजीसोबत निर्देशांक 19,819.95 वर बंद झाला आहे. याचदरम्यान निफ्टीत एनटीपीसी, कोल इंडिया आणि बीपीसीएलचे समभाग हे 2 टक्क्यांनी वधारले आहेत. यासोबतच युपीएल आणि आयशर मोर्ट्सचे समभाग एक टक्क्यांनी प्रभावीत होत बंद झाला आहे.
या क्षेत्रांची कामगिरी
सदरच्या कामगिरीसोबत विविध क्षेत्रांच्या स्थितीमध्ये कॅपिटल गुड्स, ऑईल अॅण्ड गॅस, ऊर्जा आणि रियल इस्टेट यांचे निर्देशांक हे 1.5 ते 2 टक्क्यांनी मजबूत राहिले आहेत. तसेच औषध क्षेत्राचा निर्देशांक 0.3 टक्क्यांनी प्रभावीत झाला आहे. यामध्ये बीएसई मिडकॅपचा निर्देशांक 0.9 टक्क्यांनी तेजीत राहिला आहे. तसेच स्मॉलकॅपचा निर्देशांक 0.4 टक्क्यांनी वधारुन बंद झाला आहे.
बीएसईमध्ये सेन्सेक्समधील एनटीपीसी आणि टाटा मोर्ट्स यांचे समभाग हे 2 टक्क्यांनी वधारले आहेत. तसेच लार्सन अॅण्ड टुब्रो, बजाज फिनसर्व्ह, भारती एअरटेल यांचे समभाग एक टक्क्यांनी तेजीत राहिले आहेत. यासह एचडीएफसी बँक, टायटन, स्टेट बँक, रिलायन्स इंडस्ट्रीज, पॉवरग्रिड कॉर्प, आयसीआसीआय बँक, एचसीएल टेक, बजाज फायनान्स, मारुती सुझुकी, इंडसइंड बँक, कोटक महिंद्रा बँक, अॅक्सिस बँक आणि हिंदुस्थान युनिलिव्हर याचे समभाग वधारले आहेत.
अन्य कंपन्यांमध्ये अल्ट्राटेक सिमेंटचे समभाग सर्वाधिक घसरणीत तसेच आयटीसी, टेक महिंद्रा, विप्रो, टाटा स्टील, जेएसडब्ल्यू स्टील आणि एशियन पेन्ट्स यांचे समभाग प्रभावीत होत बंद झाले आहेत.
