शिवसेना प्रमुख संजय पवार यांची माहिती; मुंबईतील मेळावा अभूतपूर्व असेल
कोल्हापूर प्रतिनिधी
शिवसेनेच्या शिवतीर्थावरील मेळाव्याला 56 वर्षांची परंपरा आहे. या मेळाव्यात शिवसेना प्रमुख बाळासाहेब ठाकरे जे विचार मांडतात त्यातून ऊर्जा घेऊन शिवसैनिक वर्षभर कार्य करत असे. तीच परंपरा शिवसेना पक्षप्रमुख उद्धव ठाकरे यांच्याबरोबर शिवसैनिकांनी जपली आहे. आजच्या शिवतीर्थावरील शिवसेनेच्या दसरा मेळाव्यासाठी कोल्हापूर जिल्हय़ातून आठ ते दहा हजार शिवसैनिक जाणार आहेत. त्यातील काहीजण मंगळवारी बस, खासगी कार, ट्रव्हल्सने गेले आहेत. काही आज सकाळी रवाना होणार आहेत, अशी माहिती शिवसेना जिल्हा प्रमुख संजय पवार यांनी दिली.
पवार म्हणाले, राज्यात घडलेल्या राजकीय घडामोडींनंतर शिवसेना पक्षप्रमुख उद्धव ठाकरे शिवतीर्थावरील दसरा मेळाव्यात काय बोलणार?, कोणता विचार, संदेश आणि आदेश देणार? याकडे साऱया शिवसैनिकांच्या नजरा आहेत. त्यामुळे प्रतिवर्षीपेक्षा यंदाच्या दसरा मेळाव्याला अभूतपूर्व गर्दी होणार आहे. राज्यभरातून शिवसैनिक मुंबईत दाखल होत असून काही जण आज पहाटे रवाना होणार आहेत.
आमचा मेळावा, त्यांची सहल
शिवसेना आणि उद्धव ठाकरेंवर प्रेम करणाऱया शिवसैनिकांचा आज शिवतीर्थावर मेळावा आहेत. त्यासाठी शिवसैनिक आसुसलेला आहे. मात्र विरोधकांचा मेळावा म्हणजे मुंबईची सहल आहे. त्यांना मेळाव्यासाठी माणसे मिळत नसल्याने ते ट्रव्हल बुक करून मुंबईच्या सहलीसाठी माणसे नेत आहेत. त्या माणसांना आपण कुठे जात आहोत हे माहिती नाही, अशा शब्दात जिल्हा प्रमुख संजय पवार यांनी शिंदे गटाच्या दसरा मेळाव्यावर टीकास्त्र सोडले.