ऑनलाईन टीम / तरुण भारत :
छत्रपती शिवाजी महाराजांची जयंती आज राज्यभरात उत्साहात साजरी होत आहे. शिवनेरी किल्ल्यावरही आज शासकिय सोहळा पार पडला. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्यासह अन्य नेत्यांनी या कार्यक्रमाला हजेरी लावली होती. त्यावरुन ठाकरे गटाच्या उपनेत्या सुषमा अंधारे यांनी भावनिक पत्र लिहित विरोधकांवर अप्रत्यक्षरित्या टीकास्त्र डागले. आज फितुरांच्या हस्ते शिवनेरी किल्ल्यावर शिवाजी महाराजांचा गौरव केला जात आहे. शिवरायांच्या हयातीत गद्दार ताठ मानेने फिरतोय, असं कधी घडलं नाही. पण यापुढे आता पुन्हा कधी असा अधर्म घडणार नाही असं वचन आम्ही तुम्हाला देतो, अशा आशयाचे हे पत्र आहे. अंधारे यांनी या पत्रातून एकप्रकारे शिंदे-फडणवीस सरकारला आव्हान दिलं आहे.
सुषमा अंधारेंनी आपल्या पत्रात म्हटले आहे की,
आदरणीय छत्रपती शिवाजी महाराज,
आम्हाला माफ करा..
आज तुमच्या जन्मदिनी,
स्वतःला मावळा म्हणणाऱ्या ढोंगी कावळय़ाच्या हस्ते, वाद्याचं कातडं पांघरलेल्या धूर्त लांडग्यांच्या हस्ते, शिवसैनिक नाव लावणाऱ्या फितुराच्या हस्ते, किल्ले शिवनेरीवर तुमचा गौरव केला जातोय..
तुमच्या हयातीत गद्दार ताठ मानेने फिरतोय,
असे कधीही घडले नाही…
पण ह्यापुढे पुन्हा कधी असा अधर्म घडणार नाही,
असे वचन आम्ही तुम्हाला देतो..
शिवश्रध्दा आणि शिवनिष्ठा मनी आहेच,
फक्त ह्या गनिमांशी लढण्याचे बळ द्या!
स्वराज्य पुन्हा स्थापन करण्याची ऊर्जा द्या!
आणि ह्या अधर्मयुध्दात विजयी होण्याचा आशीर्वाद द्या!
हर हर महादेव !!
तुमचा खरा मावळा,
सच्चा शिवसैनिक.
