प्रतिनिधी मिरज
तालुक्यामधील बेडग येथे मुलानेच वडिलांना ट्रॅक्टरखाली चिरडून ठार केल्याची घटना बुधवारी सकाळी घडली. दाजी गजानन आकळे (वय 70) असे मृताचे नाव आहे. याप्रकरणी ग्रामीण पोलिसांनी संशयित मुलगा लक्ष्मण आकळे (वय 32) याला ताब्यात घेतले आहे. वडील पैसे देत नसल्याने तसेच जमीन नावावर करीत नसल्याने मुलाने वडिलांना ट्रॅक्टरखाली चिरडून निर्दयी खून केल्याचे प्राथमिक तपासातून स्पष्ट झाले आहे.
पोलिसांनी दिलेली माहिती अशी, लक्ष्मण आणि त्याचे वडील दाजी आकळे यांच्यामध्ये गेल्या काही दिवसापासून पैसे आणि जमीन नावावर करण्यावरून वाद सुरू होता. लक्ष्मण हा वडील दाजी यांच्याकडे वारंवार पैशाची मागणी करीत होता. तसेच जमीन नावावर करण्यासाठीही त्याने तगादा लावला होता. पैसे देण्यास तसेच जमीन नावावर करून देण्यास वडिलांनी विरोध केला. त्याचा राग आल्याने लक्ष्मण याने वडिलांना बुधवारी सकाळी ट्रॅक्टर खाली चिरडून मारले. याप्रकरणी मिरज ग्रामीण पोलिसांनी लक्ष्मण याला ताब्यात घेतले आहे. पोलीस अधिक तपास करीत आहेत. मुलानेच वडिलांचा खून केल्याने मिरज तालुक्यात खळबळ उडाली आहे.
