बेळगाव : फिनिक्स स्पोर्ट्स कौन्सिल आयोजित फिनिक्स चषक 13 वर्षाखालील आंतरशालेय फुटबॉल स्पर्धेतील दुसऱया उपांत्य सामन्यात सेंट झेवियर्स संघाने इस्लामिया संघाचा 1-0 असा निसटता पराभव करून अंतिम फेरीत प्रवेश केला.
कनक मेमोरियल स्कूलच्या मैदानावर आयोजित फिनिक्स चषक आंतरशालेय फुटबॉल स्पर्धेतील दुसऱया उपांत्य सामन्यात सेंट झेवियर्स संघाने इस्लामिया संघाचा एकमेव गोलने पराभव केला. या सामन्यात पहिल्या सत्रात दोन्ही संघांना गोल करण्यात अपयश आले. दुसऱया सत्रात 32 व्या मिनिटाला इस्लामियाच्या रायन पटवेकरने गोल करण्याची नामी संधी दवडली. 41 व्या मिनिटाला रोशन झियान मुल्लाने गोल करून सेंट झेवियर्स संघाला आघाडी मिळवून दिली. ही त्यांनी अखेरपर्यंत कायम राखत विजय साकार केला.