ऑनलाईन टीम / तरुण भारत :
अकोला जिल्ह्यातील उद्धव ठाकरे गटाचे नेते ॲड. जयेश वाणी यांनी आमदारांना मिळणाऱ्या पगाराचं गणित ट्विटरच्या माध्यमातून शेअर केलं आहे. तसेच 32 लाखांचं वार्षिक पगार घेणारे आमदार स्वतःला गरीब म्हणवतात, असा टोलाही त्यांनी यावेळी लगावला आहे.
जयेश वाणी यांनी ट्विटमध्ये म्हटले आहे की, “32 लाख रुपयांचे वार्षिक, 5 वर्षांसाठी 1,63,16, 820 रुपये इतकी रक्कम पगार म्हणून मिळणारे आमदार स्वतःला गरीब म्हणवतात. विशेष इंटेस्टींग पार्ट म्हणजे मोबाईल महिन्याला 999 रुपयांमधे आणि लँडलाईनसाठी 330 रुपयांमध्ये अनलिमीटेड कॉलींग मिळत असताना आमदारांना 10,000 दिले जातात”, हे ही त्यांनी यामाध्यमातून निदर्शनास आणून दिले आहे.
या ट्विटसोबत वाणी यांनी महाराष्ट्र विधानमंडळाकडून माहितीच्या अधिकाराअंतर्गत मागवण्यात आलेल्या माहितीचे पत्र जोडले आहे. त्यामध्ये आमदारांना मिळणारे मूळ वेतन, महागाई भत्ता, दूरध्वनी सुविधा भत्ता, स्टेशनरी टपाल सुविधा भत्ता आणि संगणक चालक सुविधा मिळण्यासाठीचा भत्ता अशा वेगवेगळय़ा भत्त्यांचा समावेश आहे.
अधिक वाचा : सिसोदियांना 20 मार्चपर्यंत न्यायालयीन कोठडी