राज्यातील विविध वृत्तपत्रात मुख्यमंत्री आणि शिंदे गटाने दिलेल्या जाहीरातीवरून राज्याचे वातावरण चांगलेच तापले आहे. शिंदे गटाने राष्ट्रात मोदी महाराष्ट्रात शिंदे अशी जाहीरात चालवल्याने भाजपमध्ये नाराजीचे सूर उमटले आहेत. त्यातच मुख्यमंत्री आणि उपमुख्यमंत्र्याच्या लोकप्रियतेची आकडेवारीही प्रसिद्ध करण्यात आल्याने विरोधकांनी यावर विविध प्रतिक्रिया दिल्या आहेत. बाळासाहेब ठाकरे आणि आनंद दिघे यांचे नाव घेणाऱ्यांनी त्यांचा फोटो का वापरला नाही असा सवालही त्यांनी केला.
राष्ट्रामध्ये मोदी आणि महाराष्ट्रात शिंदे’ अशी जाहीरात शिवसेनेच्या शिंदे गटाने प्रसिद्ध केली आहे. राज्यात उपमुख्यमंत्री देवेंद्र फडणवीस यांच्यापेक्षा मुख्यमंत्री एकनाथ शिंदे हे अधिक लोकप्रिय असल्याची आकडेवारी एका सर्वेक्षणाच्या आधारे जाहीर करून शिंदे यांनी फडणवीस यांच्यावर कुरघोडी करण्याचा प्रयत्न केला असल्याचं बोललं जात आहे. या जाहिरातीवर वेगवेगळ्या राजकीय प्रतिक्रिया येऊ लागल्या आहेत. विधानसभेचे विरोधी पक्षनेते अजित पवार यांनी देखील यावर प्रतिक्रिया दिली आहे.
पत्रकार परिषदेत विरोधी पक्षनेते अजित पवार मुख्यमंत्री एकनाथ शिंदे यांच्यावर टीका करताना म्हणाले, “मुख्यमंत्री एकनाथ शिंदे किंवा अशा प्रकारच्या जाहिराती देणारे बाळासाहेब ठाकरे यांना इतक्या लवकर कसे काय विसरले ? आम्ही बाळासाहेब ठाकरे यांच्या विचारांचे आहोत, आनंद दिघे यांच्या विचारांचे आहोत, असं म्हणत त्यांनी पक्ष स्वतःकडे खेचून घेतला. परंतु त्या जाहिरातीवर कुठे आनंद दिघेंचा आणि बाळासाहेब ठाकेर यांचा फोटो दिसेना.” असा त्यांनी खोचक टोला हाणला.
शिंदे- फडणवीस यांनी केलेल्या सर्वेक्षणावर प्रश्न उपस्थित करताना ते म्हणाले, “अशा प्रकारच्या जाहिराती मी पाहिल्या आहेत पण हा वेगळा प्रकार आहे. त्यांनी स्वतःच ठरवून सर्वेक्षण केलं आणि प्रसिद्ध केलं. साधारणपणे एक्झिट पोल येतात, परंतु ते कोणी केलेत तेही सांगितलं जातं. तसा हा सर्व्हे कोणी केला आहे, याची माहिती दिली जाते. परंतु अशा प्रकाची सर्वेक्षणाची जाहिरात करण्याचा विश्वविक्रमच आपल्या राज्य प्रमुखांनी केला आहे.” असेही ते म्हणाले.
